Almatyda jańa jerasty ótkeliniń qurylysy bastaldy
ALMATY. 28 qyrkúıek. QazAqparat /Názıra Eleýhan/ - Almatyda Respýblıka alańynyń astynda (Fýrmanov jáne Jeltoqsan kósheleriniń arasynda) jaıaý júrginshilerge arnalǵan jańa jerasty ótkeliniń qurylysy bastaldy.
Jertóle «Almaly» saýda ortalyǵy ashylǵannan keıin jaıaý júrginshilerdiń erkin jáne qaýipsiz qozǵalysyn qamtamasyz etý maqsatynda salynýda. Qurylysty «Almaly Treıd» JShS-i júrgizýde.
Atalmysh mekemeniń Marketıng jónindegi dırektory Erbol Mashanovtyń aıtýynsha, jertóle Sátpaev kóshesiniń soltústik jáne ońtústik jaqtarynda salynady. «Bul ótkel jer astynda salynyp jatqan «Almaly» saýda ortalyǵynyń ajyramas bóligi bolatyn bolady. Jerasty ótkeliniń qurylysyn bıylǵy jyldyń 15 qarashasyna deıin bitirýdi josparlap otyrmyz»,-dedi ol.
Onyń aıtýynsha, qurylys jer ústinde júrgiziletindikten, 15 qazanǵa deıin alańnyń ońtústik bóligi, ákimdiktiń aldyndaǵy tusynan jabylady. «Keıin alańnyń ońtústik jaǵy ashylady da, soltústik jaǵy jabylady. Qurylys jumystary Sátpaev kóshesindegi eki baǵyttaǵy kólik qozǵalysyna áser etpeıtin bolady. Ýaqytsha qolaısyzdyqtar úshin almatylyqtardan keshirim suraımyz»,-dedi E.Mashanov.
