Almatyda jańa týǵan sábılerge elektrondy bilezik taǵylýda
ASTANA. QazAqparat - Almatyda perzenthanalarǵa arnalǵan jańa medıtsınalyq qyzmet túri iske qosyldy. Endi jańa týǵan bala men onyń anasy týraly barlyq málimetter elektrondy bilezikte saqtalady, www.24.kz.
Atalǵan jańalyqty alǵashqylardyń biri bolyp qaladaǵy №1 perzenthana engizip otyr. Jańa týǵan náresteniń qolyna taǵylatyn bilezikter eń alǵash kleenkadan jasalynatyn. Keıin olardyń ornyn plastıkalyq bilezikter basty. Al sońǵy kezderi náresteler jaıly barlyq málimet elektrondy bilezikke jazylyp júr. Ómirge jańa kelgen bul sábıdi áke-sheshesi asyǵa kútken. Tuńǵyshyn 10 jyl buryn bosanǵan Jadyra «perzenthanalardyń da zaman aǵymynan qalmaǵany durys», - deıdi. Bóbektiń esimin qoıý atasynyń enshisinde.
«Búgin atasynyń týǵan kúni. Qazirgi zamanda barlyǵy yńǵaıly. Elektrondy nusqada jasalǵan. Buryn, 10 jyl buryn bosanǵan kezde kleenkaǵa jazǵan aty-jónin», - deıdi qala turǵyny Jabyra abaeva.
. Barlyq aqparat áýeli kompıýterde teriledi. Sodan soń termoprınter arqyly basylyp shyǵady. Elektrondy bilezik sý, sabyn, spırt pen basqa da hımııalyq zattarǵa shydas beredi. Ony ashyp, qaıta jelimdeý múmkin emes. Demek, balalardy aýystyryp alý nemese málimetterdi burmalaý dáıekteriniń aldyn alady.
«Bul jerde arnaıy qulpy bar. Bir ret jelimdegen soń eshýaqytta sheshilmeıdi. Bilezikti ashqysy kelse, ol jyrtylyp ketedi. Ony qalpyna keltirý múmkin emes. Tipti qaıta jelimdegen kezdiń ózinde bilezikti buzbaqshy bolǵanyn ońaı baıqaımyz», - deıdi №1 qalalyq perzenthana bas dárigeriniń orynbasary Záýre Dathaeva.
Dárigerlerdiń aıtýynsha, medıtsınalyq servıs nárestelerdi tirkeýdi jyldamdatyp, qaýipsizdikti arttyryp otyr. Elektrondy bileziktiń tıimdiligin baıqaǵan taǵy bir perzenthana basshylyǵy bul jańalyqty engize bastaǵan.
