Almatyda jańa týǵan nárestege kúrdeli ota jasaldy
ALMATY. QazAqparat – Almatylyq dárigerler jańa týǵan nárestege kúrdeli ota jasap, ómirin saqtap qaldy, dep habarlaıdy QazAqparat tilshisi.
Balalarǵa shuǵyl medıtsınalyq kómek kórsetý ortalyǵyna týabitti aqaýmen dúnıege kelgen náreste jetkizildi. Shaqalaqqa segizkóz-quımyshaq teratomasy degen dıagnoz qoıylǵan.
Dárigerlediń aıtýynsha, jańa týǵan nárestelerde mundaı isikter óte sırek kezdesedi, qýantarlyǵy ol qaterli isikke jatpaıdy. Ota sátti jasalsa, tez saýyǵyp ketedi.
«Náresteniń isigi 20 sm. deıin ulǵaıǵan, ıaǵnı isik kólemi, balanyń salmaǵynan asyp tústi. Sondyqtan shuǵyl ota jasaý kerek boldy. Óıtkeni ol basqa aǵza músheleriniń jumysyna keri áser ete bastaıdy. Ásirese, toq ishekti qysady. Nátıjesinde jambas músheleriniń fýnktsııalary buzylady. Sonymen qatar, isiktiń jarylyp ketý qaýipi boldy », - deıdi irińdi jáne torakaldy hırýrgııa bóliminiń meńgerýshisi Myrzahmet Samatbek.
Dárigerdiń aıtýynsha, mundaı dıagnozben ota jasaý ýaqyty isik kólemimen esepteledi. Eger isik eshqandaı asqynýlarǵa alyp kelmese, onda operatsııany týǵannan bastap alty aı ishinde jasaý qajet. Odan keıinge shegýrge bolmaıdy.
Ota shamamen eki saǵatqa sozyldy jáne sátti ótti. Búgin sábı aýrýhanadan shyǵaryldy.
