Almatyda jańa tórt jolaqty jol paıdalanýǵa berildi
ALMATY. QazAqparat - Almatyda jańa tórt jolaqty jol ashyldy. Bul týraly Baqytjan Saǵyntaev óziniń Instagram-daǵy paraqshasynda jazdy, dep habarlaıdy QazAqparat tilshisi.
«Joldy jaqsartý boıynsha aýqymdy jumys jalǵasýda – jańa jol salyp, bar joldy jóndep, uzartýdamyz. Jaqynda Alataý kóshesiniń Sábdenov kóshesinen Raıymbek dańǵylyna deıingi 2 shaqyrymdyq ýchaskesi ashyldy. Tórt jolaqty jol Naýryzbaı aýdanynyń ákimshilik ortalyǵyn qalanyń iri magıstralimen baılanystyrdy. Abaı dańǵylyn uzartý jumystary aıaqtalǵan soń qala ortalyǵymen kólik qatynasy edáýir jaqsarady», - dep jazdy Almaty ákimi.
«Jańa Almatyny» damytýdyń keshendi jospary aıasynda Alataý, Túrksib pen Naýryzbaı aýdandaryna qarasty segiz yqshamaýdandaǵy 415 kóshede 108 shaqyrym jol salynyp jatyr. Sondaı-aq, bıyl Medeý aýdanyndaǵy «Dýman» yqshamaýdannyń 59 kóshesinde, ıaǵnı 30,5 shaqyrym joldyń kúrdeli jóndeý jumysy aıaqtalady.
«Uzyndyǵy 206 shaqyrymnan asatyn 212 kóshede ortasha jóndeý jumysy júrgizilýde. Sonyń 20-sy magıstraldy, uzyndyǵy 43 shaqyrym. Ol Rysqulov, Súıinbaı, Seıfýllın, Raıymbek dańǵyly, sondaı-aq Sátbaev, Kýderın, Jansúgirov, ıAssaýı, Shalıapın, Momyshuly, Jandosov, Qurmanǵazy kóshesi. Jóndeý jumysynyń jalpy kóleminiń shamamen 20%-yn aıaqtaý qaldy»,- dep atap ótti Baqytjan Saǵyntaev.
Jalpy, 237 shaqyrym jolda ortasha jáne kúrdeli jóndeý júrgiziledi. 71 shaqyrym ınjenerlik jeliler salynǵannan keıin qalpyna keltiriledi. Al 70 shaqyrym jol birinshi ret salynady.
«Jol qozǵalysyn basqarý protsesterin avtomattandyrý jalǵasýda. Búgingi kúni QBAJ (qozǵalysty basqarýdyń avtomattandyrylǵan júıesi) modernızatsııasynyń birinshi kezeńi aıaqtaldy, onda 93 baǵdarsham obektisi júıege qosylǵan. Basqarý ortalyq basqarý ortalyǵynyń úı-jaıynan júzege asyrylady. Qazirgi ýaqytta paıdalanýǵa berý jumystary júrgizilýde. Ekinshi kezeń, 357 baǵdarshamdy QABJ-ǵa qosýdy kózdeıdi, ol 2022 jylǵa josparlanǵan»,- dep jazdy ákim.
