Almatyda jańa tehnologııanyń kómegimen moıyn omyrtqasyna ota jasaldy
Aýrýhananyń baspasóz qyzmetinen málim etkendeı, 48 jastaǵy naýqas aýrýhanaǵa moıyn omyrtqasy aýyratynyn aıtyp túsken. Aýyrǵany sonsha, basyn bura almaı qalǵan.
«Tekserýden keıin naýqas shuǵyl túrde neırohırýrgııa bólimshesine jatqyzyldy. Kelesi kúni onyń omyrtqasyna tehnıkalyq kúrdeli ári sırek ota jasaldy. Operatsııa «tis tárizdi ósindini burandamen transdentaldy osteosıntezdeý» dep atalady. Aýrýhana dárigerleri emdeýdiń bul ádisin alǵash ret qoldandy«, - dep habarlady aýrýhanada.
Alǵashqy otany neırohırýrg Tımýr Aıtmuhanov jasady.
«Moıyn omyrtqasy 7 omyrtqadan turady. Birinshi men ekinshi omyrtqa kóteretin fýnktsıonaldyq júktemege baılanysty erekshe mánge ıe. Birinshi omyrtqa – atlant, ekinshi omyrtqa – aksıs dep atalady. Olar bir-birimen S2 omyrtqasynyń tis tárizdi ósindisi men atlanttyń aldyńǵy doǵasynan túziletin krıývele býyny arqyly baılanysady. Omyrtqanyń bul segmentiniń mańyzdylyǵy – bas qozǵalysynyń 50-den 70% deıin osy bólimde bolady. Biraq, tis tárizdi ósindiniń synýy kezinde bul fýnktsııa zardap shegedi», - deıdi dáriger Tımýr Aıtmuhanov.
Operatsııadan keıin naýqas palataǵa aýystyryldy. Moıyn omyrtqasynyń qozǵalysy qalpyna keldi.
Neırohırýrgtar ımplanttyń jumysyn ornatqannan keıingi birinshi kúni, bir aı, úsh aı jáne alty aıdan keıin tekseredi. Olardyń aıtýynsha, bul ádis aýrýhanaǵa jatqyzý uzaqtyǵyn qysqartýmen qatar, naýqastyń múgedek bolý qaýpin de kúrt tómendetedi.