Almatyda jańa teatr ashylady
ALMATY. Qarashanyń 4-i. QazAqparat /Názıra Eleýhan/ - Qarashanyń 6-sy kúni Almatyda qazaq balet tarıhynda tuńǵysh ret jas balet ártisterine arnalǵan «Órleý» atty jańa teatr ashylady,
dep habarlaıdy QazAqparat.
Atalmysh teatr A.V.Seleznev atyndaǵy Almaty horeografııalyq ýchılışesiniń 75 jyldyq mereıtoıy qurmetine oraı, ýchılışe janynan ashylmaq. Ýchılışe ókilderiniń aıtýynsha, jańa teatrdyń ashylý saltanatyna qazaqstandyq jáne sheteldik balet juldyzdary keledi. Qurmetti qonaqtardyń biri Reseı Federatsııasynyń eńbek sińirgen halyq ártisi Natalıa Voskresenskaıa Almatyǵa keshe keldi.
Jańa teatr ashylǵan kúni Amılkare Ponkellıdiń «Djokonda» operasynan «Ýaqyt bıi» atty qoıylymymen qatar, Kamıl Sen-Sanstyń «Ólip bara jatqan aqqý» atty horeografııalyq mınıatıýrasy qoıylatyn bolady. Bul álemdik shedevr sanalatyn qoıylym Reseıdiń eńbek sińirgen ártisi Natalıa Voskresenskaıanyń arqasynda qaıta jandanǵan bolatyn. Sonymen qatar kontserttik baǵdarlamada shet el jáne qazaq kompozıtorlardyń mýzykasyna jazylǵan kontserttik nómirler, zamanaýı, jańa stılde jasalynǵan horeografııalyq qoıylymdar kórsetiletin bolady.
Al qarasha aıynyń 11-i kúni A.V.Seleznev atyndaǵy Almaty horeografııalyq ýchılışesiniń 75 jyldyq mereıtoıy atalyp ótiledi.
