Almatyda jańa shaǵyn stansa ashyldy
ALMATY. QazAqparat - Almatyda búgin «Esentaı» transformatorlyq stansasy ashyldy. Joba qalanyń energetıkalyq damýy men jańǵyrtylýy aıasynda júzege asyryldy.
Nysannyń iske qosylý saltanatyna qala basshysy Ahmetjan Esimov, «Samuryq-Qazyna», «Alataý Jaryq Kompanııasy» AQ basqarma basshysy Muhıt Úmbetov qatysty. «Biz búgin jańa energetıkalyq nysandy engizip otyrmyz. «Esentaı» shaǵyn stansasy bıyl jyl basynan beri engizilgen 29-shy stansa bolyp otyr. Jańa nysan qalamyzdyń energetıkalyq qýatyn arttyryp, qaýipsizdigin nyǵaıtady dep senemiz. Osy 29 stansanyń ishinde 17 nysan álemdik standarttarǵa saı jańa zamanaýı qurylǵylarmen jabdyqtalǵan. Ol memlekettik organdar, sport nysandary, metro men turǵyn úılerdi elektr energııasymen qamtıtyn bolady», - dedi qala ákimi Ahmetjan Esimov. Ákimniń aıtýynsha, bıyl Túrksib aýdanynda da osyndaı shaǵyn stansa salý josparlanyp otyr. Jańa zamanaýı tehnologııalarmen jabdyqtalǵan «Esentaı» stansasynyń transformatorlyq qýaty 126 MVA.
