Almatyda jańa saýda oıyn-saýyq ortalyǵy ashyldy
ALMATY. 8 qarasha. QazAqparat /Erbol Turymbetov/ - Keshe ashylǵan «Mango» ortalyǵynyń qurylysyn Qazaqstannyń jyljymaıtyn múlik naryǵynda ınvestıtsııaly-qurylys jobalaryn júzege asyrýdaǵy tájirıbeli «Mango Mobile» kompanııasy saldy.
Al ortalyq qurylysynyń Bas merdigeri «Success Building» kompanııasy. Saýda oıyn-saýyq ortalyǵyn basqarýmen AQSh pen Eýropanyń saýda jáne kópfýnktsııaly ortalyqtaryn basqarýda tájirıbeli «NAI Global» kompanııasy aınalysady. Al «NAI Aristan» kompanııasy onyń qazaqstandyq seriktesi bolyp tabylady.
Qalanyń Túrksib aýdanynda ornalasqan jańa ortalyqtyń jalpy kólemi 16 myń sharshy metrdi quraıdy. Al onyń 6500 astam bóligi saýda alańy bolyp otyr. Ortalyqtyń 100 oryndyq avtoturaǵy bar. Negizgi jaldaýshylary - azyq-túlik sýpermarketi men balalar oıyn-saýyq parki jáne 4 zaldy «Chaplin Cinemas» kınoteatry.
«Mango» ortalyǵynyń ashylýy 300 jýyq jumys ornyn qamtamasyz etýmen qatar, aýdannyń áleýmettik-ekonomıkalyq, jalpy ınfraqurylymynyń damýyna qomaqty úles qosady dep kútilýde.
