Almatyda jańa paraolımpııalyq sport túri golboldan týrnır ótti (FOTO)
ALMATY. QazAqparat - Almatyda QR Tuńǵysh prezıdenti sporttyq-jattyǵý kesheninde jańa paraolımpııalyq sport túri golboldan týrnır ótti.
Sporttyq saıysty «Meıirimdi el» múgedekter qoǵamdyq qory Qazaqstan Respýblıkasy táýelsizdiginiń 25 jyldyǵyna arnaıy uıymdastyrdy. Týrnırde Almaty men oblystan 4 komanda qatysty.
Uıymdastyrýshylardyń bastamasyn Germanııa elshiligi, Ulttyq paraolımpııalyq komıtet, sport kesheniniń dırektsııasy qoldady.
Mundaı oıyn álemde zaǵıp jandardyń arasynda óte tanymal.
«Bul sport túri 1946 jyly Ekinshi dúnıejúzilik soǵys aıaqtalǵanda paıda bolǵan. Ol kezde maıdannan qaıtqan múgedekter kóp bolǵan. 70 jyldary bul paraolımpııalyq sport túri qataryna kirgizildi. Dýısbýrgtaǵy zaǵıp jandar uıymy qazaqstandyq sportshylarǵa 30-ǵa tarta arnaıy dop syılady. Biz Qazaqstan golbolshylarynyń da halyqaralyq dodalarǵa qatysýyn qalaımyz», - dedi GFR Almatydaǵy bas konsýly Renate Shımkoraıt.
Oıynnyń basty sharty dopty qarsylas komandanyń shekarasynan asyryp jiberý. Golbol dobynyń ishine zaǵıp jandarǵa arnap qońyraý ornatylǵan.
