Almatyda jańa oqý jylynda úsh mektep ashylady

ALMATY. QazAqparat- Almatyda 1 qyrkúıekte úsh jańa mektep ashylady. Bul týraly Óńirlik kommýnıkatsııalar qyzmetiniń brıfınginde qalalyq bilim basqarmasy basshysynyń orynbasary Aıdyn Saılaýbaı málim etti, dep habarlaıdy QazAqparat tilshisi.

Vedomstvo ókili atap ótkendeı, qazir qalada mektepterdegi oryn tapshylyǵyn azaıtý sharalary jalǵasýda. Búginde ol 19 611 oryndy quraıdy.

«Bıyl 1 qyrkúıekte «Qalqaman», «Saıaly» jáne «Tomırıs» shaǵyn aýdandarynda 5100 oryndy 3 jańa mektep jáne №191, 146, 125 mektepterde 875 oryndy qosalqy ǵımarattar qoldanysqa beriledi», - dedi Aıdyn Saılaýbaı.

Qaladaǵy jalǵyz úsh aýysymdy №196 mekteptiń máselesi oqý jylynyń basynda «Mádenıet» shaǵyn aýdanynda jobalyq qýaty 1500 oqýshyǵa eseptelgen jańa mekteptiń ashylýymen sheshimin tappaq.

2022 jyldyń sońyna deıin 6000 oryndy taǵy 4 mektepti (Qalqaman-2, Qaırat, Darhan, Nurkent shaǵyn aýdandarynda) paıdalanýǵa berý josparlanýda. Sondaı-aq №48 jáne 9 mektepterdiń qosalqy ǵımarattary paıdalanýǵa berilmek.

«Qala ákimdigi 1 800 oryndy mektepterdi ornalastyrý úshin eki ǵımarat satyp alady. Sonymen qatar, oqý jylynyń basynda jeke ınvestıtsııalar esebinen 3250 oryndy 6 mektep ashylady»,-dedi spıker.

15 qalalyq mekteptiń «Mektep sport alańdaryn modernızatsııalaý» jobasyn iske asyrýǵa jergilikti bıýdjetten 1 mlrd teńge bólindi, jumysty oqý jyly bastalǵanǵa deıin aıaqtaý kózdelgen.