Almatyda jańa oqý jylynda birinshi synypqa qansha bala barady
ALMATY. QazAqparat - Almaty qalalyq bilim basqarmasynyń basshysy Gúlnár Qojabergenova jańa oqý jylynda birinshi synypqa qansha bala baratynyn aıtty, dep habarlaıdy QazAqparat tilshisi.
«Biz jyl saıyn 29 myńǵa deıin birinshi synyp oqýshylaryn qabyldaıtynbyz. Eger buryn balalar 6-7 jas aralyǵynda birinshi synypqa baratyn bolsa, bıylǵy jyldan bastap 6 jastan mektepke barýǵa tıis. Osy jańashyldyqty eskere otyryp, bıyl birinshi synypqa 32 myń balany qabyldaýdy josparlap otyrmyz», - dedi Gúlnár Qojabergenova.
Sondaı-aq, ol mektepterde oqýshy oryndarynyń jetispeýshiligi týraly da aıta ketti.
« Oqýshy oryndardyń jetispeýshiligi árqashan bolǵan jáne búgin de bar. Biraq, bul biz balany mektepke qabyldamaımyz degendi bildirmeıdi, Balalar mektepte bilim alýǵa quqyly. Balalar sany óte kóp. Tipti,sanıtarlyq normadan asyp ketemiz, 30-35 oqýshyǵa arnalǵan synyptarǵa 40 bala qabyldaımyz. Bul másele birtindep sheshiledi. Jańa mektepter salynyp jatyr. Sondaı-aq, bul demografııalyq ósimge de baılanysty. Almatyǵa qonys aýdaratyn adamdardyń da sany artty. Olardyń balalaryn mektepke qabyldaýǵa mindettimiz», - dedi ol.
Búgingi kúni Almatyda 259 mektep bar, onyń 204 memlekettik bolsa, qalǵan 55 jekemenshik. Sondaı-aq,185 mektepke deıingi mekeme bar. Onyń 669 jekemenshik balabaqsha.
«Oqý jylynyń basynda Alataý aýdanynda bir qazaq mektebin ashýdy josparlap otyrmyz, taǵy eki mektep salynyp jatyr, olar kelesi jyly paıdalanýǵa beriledi. Jeke menshik mektepter de ashylady. Balabaqshalarǵa keler bolsaq, jyl basynan beri qalada 3 memlekettik jáne 70 jekemenshik balabaqsha qoldanysqa berildi. Jyl sońyna deıin 4 memlekettik jáne 30 jeke balabaqsha esgin aıqara ashpaq», - dep túsindirdi bilim basqarmasynyń basshysy.
Aıta ketken jón, Almatyda respýblıkalyq «Mektepke jol» aktsııasy bastalyp ketti.
