Almatyda jańa oqý jylynda 1-synypqa qansha bala barady

ALMATY. QazAqparat - Almaty qalalyq bilim basqarmasynyń basshysy Lázzat Jylqybaeva onlaın brıfıng barysynda jańa oqý jylynda birinshi synypqa qansha bala baratynyn aıtty, dep habarlaıdy QazAqparat tilshisi.

«Almaty qalasynda 287 jalpy bilim beretin mektep jumys isteıdi, onyń ishinde 207 memlekettik jáne 80 jeke menshik. 2021-2022 oqý jylynda 1-synyptan 11-synypqa deıingi oqýshylardyń aldyn ala boljam boıynsha kontıngenti 300 myńǵa jýyq bala. Búgingi kúni birinshi synypqa 30 myńǵa jýyq bala qabyldandy»,- dedi basqarma basshysy.

Sonymen qatar, ol alǵashqy qońyraý qalaı ótetinine toqtaldy.

«Bilim kúni mektep aýmaǵynda ashyq aýada sap túzep, barlyq mektepterdiń 1-synyp oqýshylaryna Álippe/Býkvar tabys etiledi (erip júrýshiler sany shekteýli). 2-11 synyp oqýshylary úshin bekitilgen kabınetterde synyp saǵaty ótedi»,- dedi ol.

Lázzat Jylqybaeva mektep formasyna qoıylatyn talap saqtalatynyn aıtty. Bilim mekemesine klassıkalyq stıldegi yńǵaıly kıimmen kelýge ruqsat etiledi.