Almatyda jańa oqý jylynan bastap mektepterde úsh aýysymdy júıe bolmaıdy

ALMATY. QazAqparat- Jańa oqý jylynan bastap Almaty mektepteri bes kúndik oqý júıesine aýysady, al oqý jyly 31 mamyrda aıaqtalady. Bul týraly Óńirlik kommýnıkatsııalar qyzmetiniń brıfınginde qalalyq bilim basqarmasy basshysynyń orynbasary Aıdyn Saılaýbaı málim etti, dep habarlaıdy QazAqparat tilshisi.

«Úsh aýsymdy júıe bizde Alataý aýdanyndaǵy №196 mektepte bolǵan. Qazirgi tańda 1500 oryndyq jańa mektep salynyp jatyr. Onyń qurylysy aıaqtalǵan soń, atalǵan júıe joıylady. Jańa oqý jylynan bastap Almaty mektepteri bes kúndik oqý júıesine aýysady, al oqý jyly 31 mamyrda aıaqtalady»,- dedi spıker.

Sonymen qatar, ol qazaq tildi mektepterde orys tili 2 – synyptan, aǵylshyn tili 3 - synyptan bastap oqytylatynyn eske saldy.

«Qazaq tildi mektepterde «Álippe» jáne «Ana tili» pánderi oqytylady, orys tili 2 – synyptan, aǵylshyn tili 3 - synyptan bastap oqytylady. Al, orys tilinde bilim beretin mektepterde «Álippe», «Saýattylyqqa oqytý» jáne «Qazaq tili» oqytylady, aǵylshyn tilin balalar 3-synyptan bastap oqıdy», - dedi Aıdyn Saılaýbaı.

Onyń aıtýynsha, 1-synyptarda Kórkem eńbek «eńbekke baýlý» jáne «beıneleý óneri» bolyp eki pánge bólindi.

«Sport zaldarynyń shamadan tys júktelýine baılanysty jáne balalardyń qaýipsizdigin qamtamasyz etý úshin osy oqý jylynan bastap dene shynyqtyrý sabaqtarynda synyptardy topqa bólý júzege asyrylmaıdy»,- dep túsindirdi spıker.