Almatyda jańa meshit boı kóterdi
ASTANA. QazAqparat - Búgin qasıetti juma kúni Almaty qalasy Túrksib aýdanyna qarasty Qaırat eldi mekeninde jańa meshit ashyldy. Meshittiń bas ımamy bolyp Murathan Muhtarhanuly taǵaıyndaldy.
Bul týraly Qazaqstan musylmandary Dinı basqarmasynyń baspasóz qyzmeti habarlady.
Meshittiń ashylý saltanatyna halyq kóptep jınaldy. Qazaqstan musylmandary dinı basqarasynyń tóraǵasy, Bas múftı Erjan qajy Malǵajyuly, Túrksib aýdanynyń ákimi Vladımır Nıkolaevıch alǵy sózin sóılep, musylman qaýymyn quttyqtady.
«Bul eldiń ımandylyqqa kóptep bet burǵany jáne halyqtyń jaǵdaıynyń jaqsarǵany, ál-aýqattyń jaqsarǵany jáne bul birligimizdiń, tirligimizdiń bir ekenin kórsetedi», - dedi Bas múftı Erjan qajy Malǵajyuly. Bul Almaty qalasynda ashylǵan 42 - meshit. Meshit jeke kásipkerler men halyqtyń kómegimen boı kóterdi.
Zeınep Qabdulhaqqyzy, Qaırat aýylynyń turǵyny:
- Bul meshit ashylady degendi estigende qýandyq. Búgin kórshimnen estip, bárin tastap, júgirip keldik. Bas múftıimiz Erjan qajy Malǵajyuylyna, elge qyzmet etip júrgen azamattarǵa alǵysymdy aıtamyn.
Qul-Kerim Elemes, aqyn:
- Halyqty ıgilikke, musylmandyqqa, ımandylyqqa, ıbalylyqqa tárbıeleıtin meshittiń ashylýy qandaı keremet, ǵajap nárse. Osy meshittiń qurylysyna atsalysqan azamattarǵa Alla razy bolsyn. Elimizde osyndaı meshitter kóptep ashyla bersin.
