Almatyda jańa mamandyqtar atlasy jasalady
ALMATY. QazAqparat- Almatyda jańa mamandyqtar atlasy jasalady. Onyń erekshelikteri, maqsattary men mindetteri týraly qalalyq bilim basqarmasy basshysynyń orynbasary Qaırat Jumanov aıtyp berdi, dep habarlaıdy QazAqparat tilshisi.
Salalyq sarapshylardyń pikirinshe jańa kásipter men quzyretterdiń atlasy - qazirdiń ózinde suranysqa ıe jáne jaqyn arada paıda bolatyn mamandyqtar jınaǵy.
Qaırat Jumanovtyń aıtýynsha, atlas Almaty qalasynyń ereksheligin eskere otyryp qalyptasady.
Ázirleý nátıjesi boıynsha óńir úshin, onyń ishinde orta bilimnen keıingi tehnıkalyq jáne kásiptik synyptaýyshqa engiziletin bolashaq kásipter boıynsha naqty usynymdar beriledi.
Qazirgi ýaqytta Almaty ákimdigi janyndaǵy memlekettik bilim berý tapsyrysyn bólý, qalyptastyrý jáne ornalastyrý jónindegi komıssııa qalalyq eńbek naryǵynda suranysqa ıe mamandyqtardyń tizimi men sanyn esepteý boıynsha jumys júrgizýde.
30 sáýirden bastap memlekettik tapsyrys qarastyrylǵan mamandyqtar týraly aqparat Bilim basqarmasynyń saıtynda jarııalanady.
Spıker sondaı-aq, 2019 jyldyń qańtarynan bastap Almatynyń 20 memlekettik kolledjinde jan basyna qarjylandyrý engizilgenin, al 2022 jyldyń qańtarynan bastap taǵy 29 jekemenshik kolledj memlekettik tapsyrys aıasynda jumys isteı bastaǵanyn eske saldy.
«Memleket basshysynyń memlekettik tapsyrysty tehnıkalyq mamandyqtarǵa qaıta baǵdarlaý týraly tapsyrmasy boıynsha bıyl stýdentterdiń 60%-y kolledjderge tegin qabyldanady»,- deıdi Qaırat Jumanov.
