Almatyda jańa Qylmystyq-protsestik kodekstiń eki aılyq jumysy qorytyndylandy
ALMATY. QazAqparat - Almaty oblysynda QR Joǵarǵy sot jáne Bas prokýratýra, Konstıtýtsııalyq keńes ókilderi jańadan qabyldanǵan Qylmystyq-protsestik kodekstiń tıimdiligi talqylady. Sarapshylar jańa zańnamanyń eki aı ishindegi nátıjelerin talqyǵa saldy.
«Qylmystyq sot isin jańartý quqyq qorǵaý júıesiniń tıimdiligin jáne Respýblıka Konstıtýtsııasynyń quqyq qorǵaý áleýetin iske asyrýdy qamtamasyz etýdiń kepili» taqyrybynda dóńgelek ústel ótti. Otyrysty ashqan Bas prokýrordyn birinshi orynbasary Iogan Merkel jańadan qabyldanǵan Qylmystyq-protsestik kodekstiń azamattardyń quqyqtarynyń qorǵalýyn kúsheıtip, qylmystyq protsestiń tıimdiligi men únemdiligin arttyratyny jáne ony halyqaralyq standarttarǵa barynsha jaqyndatatynyn aıtyp ótti. Forým aıasynda Qylmystyq-protsestik kodekstiń jańa talaptary keńinen talqylandy. Qylmystyq sot isin jetildirý salasyndaǵy halyqaralyq tájirıbe týraly jan-jaqty pikir almasyldy. «Qylmystyq sot óndirisin jańǵyrtý máselesi - óte ózekti. Memleket basshysy Nursultan Nazarbaev quqyq qorǵaý salasyn reformalaý qajettigin 2010 jylǵy joldaýynda tilge tıek etken bolatyn. Sodan beri quqyq qorǵaý júıesin ońtaılandyrý, zańnamany izgilendirý baǵytynda aýqymdy jumys júrgizildi. Jańa onjyldyqta jańa quqyq júıesi halyqaralyq standarttarǵa tolyǵymen jaýp berýi kerek»,- dedi QR Qaýipsizdik keńesiniń hatshysy, QR Prezıdentiniń keńesshisi Nurlan Ermekbaev. Onyń aıtýynsha, jana zańnama qazir esh kedergisiz jumys jasap tur. Jıynǵa qatysqan sheteldik uıymdardyń ókilderi Eýropa Keńesiniń Venetsııalyq komıssııasynyń ókilderi Nıkolaı Kýznetsov jáne Gýnars Kýtrıs, GFR Tómengi Saksonııanyń Ádilet mınıstriniń otstavkadaǵy orynbasary Olerkıng ıÝrgen jańa zańnama Qazaqstannyń halyqaralyq quqyq júıesiniń standarttaryna jaqyndaýyna yqpal etetinin atap ótti.
