Almatyda «Jańa Qazaqstan» jastar qozǵalysy qurylady
Mundaı bastamany alǵashqy bolyp kásipker, metsenat Syrymbek Taý kóterdi.
«Biz zańdy tulǵa nemese saıası qozǵalys emespiz. Biz qoǵam belsendilerimiz. Tek jastardy birlikke shaqyrǵymyz keledi. Biz elimizdi birge damytýymyz kerek», - dedi ol baspasóz máslıhatynda.
Spıker Qazaqstan Respýblıkasy Prezıdentiniń Jańa Qazaqstandy qurý týraly bastamasyn qoldaıtynyn jetkizdi.
«Árıne bul bastamany qýana qoldaımyz. Jastar bolyp eldi birlikke, berekege shaqyratyn aktsııalar ótkizý týraly usynysymyzdy qalanyń kóptegen oqý oryndaryndaǵy jastar qoldap otyr. Bul aktsııa naýryzdyń 18 kúni ótedi»,- dedi Syrymbek Taý.
Aıtýynsha, 18 naýryz kúni saǵat 14:00-de Almaty jastaryna jaqsy serpilis berý úshin «Almaty arenada» jeke kásipkerlerdiń qoldaýymen kontsert uıymdastyrylady.
«Bul stýdentter festıvali bolady. Kontsertke tanymal óner juldyzdary, kásipkerler, qoǵam belsendileri men sportshylar qatysady, olar merekelik baǵdarlamamen qosa, ónegeli áńgime aıtyp, óz tájirbıesimen bólisedi», - dedi Syrymbek Taý.
G-38 stýdentter qozǵalysynyń negizin qalaýshy Aısulý Ernııazova stýdentter bul aktsııa jaıly áleýmettik jeliden oqyp, ony qýana qoldaǵanyn jetkizdi.
«Qaladaǵy onǵa jýyq ýnıversıtettiń stýdenteri de bul aktsııaǵa qoldaý kórsetti. Óıtkeni pandemııa kópshiligimizge teris áser etkeni belgili, mundaı kóńildi sharalar ásirese jastar úshin qajet. Qazirgi 3-shi kýrsta oqyp júrgenderdiń stýdenttik ómiri pandemııa bastalǵan kezde, ıaǵnı 1 kýrstyń birinshi semestirinen keıin toqtap qaldy. Al, 1-2 kýrsta oqıtyndar tipten stýdenttik ómirdi sezingen joq. Sondyqtan qazir qaladaǵy stýdentterdiń basyn qosatyn mundaı sharalarǵa degen suranys óte joǵary. Joǵary býyn ári bıznes qaýymdastyq osyndaı sharany ótkizýdi qolǵa alǵandyqtan ony stýdentter qýana qarsy alyp otyr»,-dedi Aısulý Ernııazova.
Óz kezeginde shyǵarmashyl jastardyń ókili Ońdasyn Qulymbet aýqymdy aktsııa stýdentterdiń bir-birimen til tabysyp, tájirıbe almasýǵa múmkindik beretinin atap ótti.
Belgili kásipqoı boksshy Janqosh Turarov ta qoldaý kórsetip, Qazaqstan halqyn birlikke, qoǵamdyq ómirge belsene aralasýǵa shaqyrdy.