Almatyda jańa ınfektsııalyq gospıtal salynady
ALMATY. QazAqparat – Almatyda 700 orynǵa arnalǵan jańa ınfektsııalyq gospıtal salynýy múmkin. Bul týraly qalalyq Qoǵamdyq keńestiń vıdeo otyrysynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aıtty, dep habarlaıdy QazAqparat tilshisi.
«Bizde 2 ınfektsııalyq statsıonar jumys istep tur. Alaıda ekeýinde de ınfektsııalyq baqylaý talaptaryna sáıkes jeldetý júıesi tolyq jumys istemeıdi. Osyǵan baılanysty qazir qala ákimdigi men qala ákiminiń jeke óziniń tarapynan barlyq talaptarǵa saı keletin 700 oryndyq jańa gospıtal salý týraly shara qabyldanyp jatyr. Bul saýal Memleket basshysynyń Almatyǵa sapary barysynda kóterildi. Atalǵan saýal kezeń-kezeńimen sheshimin tabatyn bolady», - dedi qalalyq Qoǵamdyq densaýlyq basqarmasynyń basshysy Tileýhan Ábildaev.
Basqarma basshysy keńes kezinde salynǵan aýrýhanalardyń barlyǵy derlik talapqa saı emestigin jetkizdi.
Aıta ketý kerek, 24 sáýirde Almatyda koronavırýspen aýyrǵan naýqastardy emdeýge arnalǵan jańa gospıtal ashylǵan bolatyn.
Aýmaǵy 5 850 sharshy metr bolatyn jańa gospıtal bir mezette 280 naýqas qabyldaı alady. Qarqyndy terapııa bólimine 28 oryn bólingen. Munda 28 ókpeni jeldetý apparaty bar.
