Almatyda «Jańa ǵasyr tolqyndary» atty kórmege jas sýretshilerdiń 300-den astam týyndysy qoıyldy
ALMATY. QazAqparat - Búgin Almaty qalalyq metropolıteniniń «Máskeý» beketiniń foıesinde otandyq jas sýretshilerdiń «Jańa ǵasyr tolqyndary» atty kórmesi ashyldy.
T. Júrgenov atyndaǵy Qazaq ulttyq óner akademııasy uıymdastyrǵan bul ıgi sharaǵa 100-ge jýyq avtordyń 300-den astam týyndysy jurtshylyq nazaryna usynyldy.
«Bul eńbekterdiń ishinde beıneleý óneriniń barlyq derlik baǵyty qamtylǵan. Olardyń ishinde abstratsııalyq, ımpressıonıstik, realıstik, grafıkalyq, gobelendik, músindik, tipti monýmentaldyq keskindeme janrynda salynǵan kartınalar bar. Biz bul kórmeni ne úshin uıymdastyrdyq? Óıtkeni jas sýretshilerdi elge tanytý ońaı emes. Jurtshylyq mýzeılerge bara bermeıdi. Onyń ústine mýzeılerde kórme uıymdastyrý úshin kezekke turý qajet. Ol tegin de bola bermeıdi. Sondyqtan biz halyq kóp shoǵyrlanatyn metro beketin tańdap alyp, osy jerge bolashaǵynan úmit kúttiretin, suranysqa ıe bola bastaǵan, daryndy da jasampaz jas sýretshilerdiń eleýli jumystarynan kórme uıymdastyryp otyrmyz. Maqsatymyz - olarǵa qoldaý kórsetý jáne qala turǵyndaryn jas tolqynnyń beıneleý ónerimen qaýyshtyrý», - dedi «QazAqparat» tilshisine bergen suhbatynda T. Júrgenov atyndaǵy Qazaq ulttyq óner akademııasy Keskindeme jáne dızaın fakýltetiniń dekany, Qazaqstannyń eńbek sińirgen qaıratkeri, professor Baýyrjan Baıdildá.
Sonymen qatar ol kórme uıymdastyrýǵa kúz mezgiliniń bekerge tańdap alynbaǵandyǵyn jetkizdi.
«Kúz mezgili bul jyldyń eń bir jaıma-shýaq, boıaýy qanyq kezi ǵoı. Qyzyl-sary túsi aıshyqty da anyq kezi. Osyndaı shaqta sýretshiler plenerge, ıaǵnı ashyq aspan aıasynda sýret salýǵa shyǵady. Mine myna kórmeden sol jumystardy kórýge bolady. Taqyryp jaǵynan jastarǵa eshqandaı shekteý qoıǵan joqpyz. Bul avtorlardyń kóńili qalaǵan, oıynan shyqqan, jan dúnıesiniń, seziminiń qalaýymen jasalǵan jumystary», - dedi B. Baıdildá.
Aıta ketelik, bul jerde tek qana T. Júrgenov atyndaǵy Qazaq ulttyq óner akademııasynyń stýdentteri men túlekteri ǵana emes, óner salasy boıynsha bilim beretin basqa da joǵary oqý oryndarynyń stýdenttri men túlekteriniń jumystary qoıylǵan.
Sonymen qatar, birqatar jas sýretshiler kelýshilerge keskindeme salasy boıynsha sheberlik synyptaryn júrgizdi.
Kórme bir aıǵa sozylady.
