Almatyda jańa formattaǵy kitaphanalar ashylady
ALMATY. QazAqparat – Almaty ákimi Baqytjan Saǵyntaev qalanyń kitaphana jelisin qaıta jańǵyrtý jumystarynyń barysymen tanysty, dep habarlaıdy QazAqparat tilshisi.
«Kitaphanalar kitaptar saqtalatyn oryn ǵana emes, sonymen qatar qoǵamdyq keńistikke aınalýda. Oǵan mysal Jambyl atyndaǵy jasóspirimder kitaphanasy, modernızatsııalaýdan ótken soń, ol ejelgi kitaptar men elektrondy kitaptardy oqıtyn zamanaýı ortalyqqa aınaldy. Munda kún saıyn 500-den 1500 deıin oqyrman keledi. Olar negizinen 14-29 jas aralyǵyndaǵy jastar», - dep jazdy Baqytjan Saǵyntaev Іnstagram-paraqshasynda.
Taıaý ýaqytta qalada modernızatsııalaýdan ótken bes kitaphana ashylady dep kútilýde. Olar: №15 (Zemnýhova kóshesi, 44), №20 (Sháripov kóshesi, 66), №24 (Aınabulaq-3 yqshamaýdany, 174 úı), №32 (Dostyq dańǵyly, 42B), №33 (Tóle bı kóshesi, 160).
«Internetke erkin qoljetkizý, mol kitap qory sapaly bilim alýǵa jáne jaıly jaǵdaılarda dıplom nemese dıssertatsııa jazýǵa múmkindik beredi. Zamanaýı kitap ortalyqtary taqyryptyq kezdesýler men sheberlik synyptaryn ótkizetin oryndarǵa aınalady», - dep jazdy ákim.
