Almatyda jańa formattaǵy eki mektep ashyldy
Almatynyń eki aýdanynda 3300 oryndy jańa mektepter ashyldy. Olar Alataý aýdanyndaǵy №205 mektep pen Naýryzbaı aýdanyndaǵy 1800 oryndy №206 mektep.
Qala ákimi Baqytjan Saǵyntaev jumys sapary kezinde jańa oqý oryndaryn aralap kórdi. Mektepter zamanaýı jıhazdarmen, qajetti oqý qurylǵylarymen jabdyqtalǵan. №205 mekteptiń iske qosylýy 1500 oqýshy ornynyń tapshylyǵyn azaıtýǵa múmkindik berdi.
Ákimdikte málim etkendeı, jańa mektepter tıptik jobalar boıynsha salynbaǵan. Jobalaý kezinde oqý oryndaryna qoıylatyn jańa standarttar arnaıy ázirlenip, qabyldandy. Olar zamanaýı sáýlet, oılastyrylǵan keńistiktik dızaın, keń synyptar men qoǵamdyq keńistikteri bar ergonomıkalyq ınterermen erekshelenedi.
Mektepter zamanaýı Face ID qaýipsizdik júıesimen jabdyqtalǵan. Ata-analar balalardyń kirýi men shyǵýy týraly habarlamalar alady. Úsh jaǵynan kiretin jeke toptar qaýipsiz sanıtarlyq-epıdemıologııalyq rejımdi qamtamasyz etýge múmkindik beredi.
Aıta keteıik, keler 2022 jyly «Qalqaman» yqsham aýdanynda 1500 oryndy mekteptiń,«Qarǵaly» yqsham aýdanyndaǵy «Zerde» jeke menshik mektebiniń, «Shuǵyla» yqsham aýdanynda 1200 jáne 1500 oryndy eki mekteptiń,«Quramys» yqsham aýdanynda 1200 oryndy mektepiń qurylystaryn aıaqtaý jáne №15 sanatorlyq-mektep ınternatty rekonstrýtsııalaý josparlanǵan.
Qazirgi tańda «Saıaly», «Nurkent», «Darhan» jáne «Rahat-Mádenıet» yqsham aýdandarynda 6300 oryndy 4 mekteptiń qurylysy júrgizilýde. Olardy 2022 jyly tapsyrý jospardaǵy is.
Sondaı-aq,«Saıaly-2» yqsham aýdanynda 550 oryndy jáne «Zerdeli» yqsham aýdanynda 600 oryndy mektep qurylystarynyń JSQ-lary ázirlenýde.«Shapaǵat» yqsham aýdanynda 600 oryndy mektep qurylysy úshin №150 mektepke irgeles jer ýchaskelerin satyp alý boıynsha jumystar júrgizilýde.
Jalpy, Almatyda aǵymdaǵy jyly qalalyq bıýdjet esebinen 18 oqý orny salyndy, onda 11 563 oqýshy orny quryldy.