Almatyda jańa demalys oryndary ashylady
ALMATY. QazAqparat – «Maıak» shaǵyn aýdany, «Jeltoqsan» saıabaǵy jáne Esentaı ózeniniń jaǵalaýynda jańa demalys oryndary ashylady, dep habarlaıdy QazAqparat tilshisi.
Almaty qalasy ekologııa jáne qorshaǵan orta basqarmasy basshysynyń orynbasary Ulan Abdýldaevtyń aıtýynsha, qala shekarasynyń keńeıýi, kólik ınfraqurylymynyń damýy, turǵyn úı qurylysy, sondaı-aq halyq sanynyń ósýine baılanysty jańa qoǵamdyq aımaqtardy uıymdastyrýǵa qajettilik týyndap otyr.
«Birinshi kezekte qalanyń tómengi bóliginde jańa qoǵamdyq jasyl aımaqtar qurylady. Bul rette jańa saıabaqtar men alańdardy jabdyqtaý boıynsha 10 joba ázirlenip jatyr. Jobalyq-smetalyq qujat ázirleýge qarajat bólýge ótinim berildi», - dedi ol.
Sondaı-aq, jalpy aýdany 206,6 gektar bolatyn jańa demalys aımaqtaryn qurý úshin jobalyq-smetalyq qujattar ázirlenip jatyr. Aldaǵy ýaqytta Saıran kóliniń jaǵasynda jańa qoǵamdyq aımaq qurylmaq jáne Baým toǵaıy abattandyrylady.
«Bıylǵy jyldyń sońyna deıin Almatyda 4 jańa saıabaq alańy qurylyp, 4 saıabaq qaıta qalpyna keltiriledi», - dedi Ulan Abdýldaev.
Aıta keteıik, qazirgi tańda Almatyda barlyǵy 211 qoǵamdyq nysan (saıabaqtar, jaǵalaýlar jáne t.b.), sondaı-aq 4 tabıǵı aımaq («Medeý» muzaıdyny, «Baým» toǵaıy, «Іle Alataý» ulttyq tabıǵı parki – 12 219 ga, Botanıkalyq baq) bar.
