Almatyda jańa balet teatry men kongress-ortalyq salynady

«Almaty qalasyn damytý 50 draıver- jobasy» aıasynda 2020 jyly salynatyn Balet teatry Ál-Farabı dańǵylynyń boıymen jáne Nazarbaev kóshesiniń batys jaǵynda uzaq ýaqyt boıy bos turǵan jer ýchaskesinde salynbaq.

«Ǵımarattyń arhıtektýrasy - erekshe bolmaq. Onyń ishine sýburqaqtar salynyp, tolyqtaı kógaldandyrlady. Qurylys kóp qabatty elementtermen tolyqtyrylady. Túsi men paıdalanylatyn jaryqttyń da mańyz zor», - dep túsindirdi ákimdik.

Joba boıynsha teatrdyń keńistigi jartylaı fýnktsıonaldy jáne transformaly bolmaq. Ol jerde túrli iskerlik kezdesýler men saltanatty sharalar ótkiziletin bolady. Ǵımaratta balalarǵa arnalǵan horeografııa mektebin ashý josparda bar.

Almaty qalasynda jyl saıyn 50-den astam halyqaralyq túrli is- sharalar ótedi. Sondyqtan zamanaýı kongress-ortalyǵynyń qurylysy qajettilikterden týyndaýda.

«Almaty qalasynyń 50-den astam jobasy» aıasynda bıylǵy jyly birqatar áleýmettik ınfraqurylym nysandarynyń qurylysy aıaqtalady, sondaı-aq seısmıkalyq kúsheıtý jáne ǵımarattardy qaıta jańartý, kósheler men saıabaqtardy abattandyrý jumystary aıaqtalady. Tek osy jobalardyń arqasynda 5 myńǵa jýyq qosymsha jumys orny ashylyp, qalalyq bıýdjetke 8,8 mlrd teńge salyq túsimi tústi.

Jyl sońyna deıin Respýblıka alańy, Dostyq dańǵyly, Baıseıitova jáne Jibek joly kósheleri, Vernenskıı observatorııasy, Almaty zoobaǵy, Medeý densaýlyq baspaldaǵy men Myńjyldyq sýburqaǵyn qaıta qalpyna keltirý jumystary aıaqtalady. Sondaı-aq, qalanyń segiz aýdanyndaǵy barlyq jaıaý júrginshiler jolyndaǵy jumystar aıaqtalady dep kútilýde.

Budan basqa, otbasylyq dárigerlik ambýlatorııa qurylysy, №4 perzenthana men Túrksib aýdanyndaǵy psıhonevrologııalyq mektep-ınternatynyń janynda boı kótergen qosalqy ǵımaratar qoldanysqa berilmek.

Sonymen qatar Alataý aýdanyndaǵy jedel medıtsınalyq qosalqy stantsııa men patologoanatomııalyq bıýrosynyń da qurylysy aıaqtalmaq. Jáne taǵy 6 jańa balabaqsha men 10 mektep paıdalanýǵa beriledi.

Avtory: Alma Muhanova