Almatyda jańa Anımatsııalyq birlestiktiń ortalyǵy tanystyryldy
; ALMATY. Mamyrdyń 31-i. QazAqparat /Názıra Eleýhan/ - Búgin Almatyda Sh.Aımanov atyndaǵy "Qazaqfılm" AQ jańa Anımatsııalyq birlestiktiń ortalyǵymen tanystyryp, úsh mýltfılmniń - "Qoshqar men teke", "Momyn men qaraqshylar" jáne "Aıka " dep atalatyn kıik týraly túsirilgen anımatsııalyq fılmderdiń tusaýkesirin ótkizdi,
dep habarlaıdy QazAqparat.
Ortalyq jaqsy mýltıplıkatsııany jasaýǵa múmkindik beretin zamanaýı tehnıkamen jabdyqtalǵan, atap aıtqanda, Apple jáne Macintosh tehnıkasymen, lıtsenzııaly Maya, Animator pro, 3D-coat, Mudbox baǵdarlamalarymen, Adobe baǵdarlamasynyń tolyq paketimen jáne kóptegen grafıkalyq baǵdarlamalarmen qamtylǵan.
«Buǵan deıin de ortalyq jumys istedi, Úkimettiń bul óner túrin túsinip, qoldaýynyń arqasynda Ortalyqta qaıta jóndeý jumystary júrgizilip, búgingi zamanǵy tehnıkamen jabdyqtalyp, mine, qaıtadan jańa kelbetin ashyp otyr. Ortalyqta 15-teı jańa kompıýterler qoıyldy. Onda respýblıkamyzdyń túkpir-túkpirinen kelgen eń úzdik anımatorlar jumys isteýde. Olar úshin jańa múmkindikter ashyldy dese bolady. Bul jańa Ortalyqtyń ashylýymen Qazaqstanda anımatsııalyq ónerdiń jańǵyrýy bastaldy. Endi bizdiń jas urpaq otandyq, bizdiń mýltfılmderimen tárbıelenetin bolady», dedi anımatsııalyq birlestiktiń jetekshisi Jáken Dánenov.
Ortalyqtyń kompıýterli grafıka boıynsha jetekshi mamany Berik Júnisbekovtyń aıtýynsha, búgingi zamanǵa saı laıyqtalǵan jabdyqtar óndiris shyǵynyn aıtarlyqtaı azaıtyp, ýaqytty únemdeýge múmkindik beredi. «Buryn bári qolmen salynyp, jasalyp, oǵan 10-nan asa adam jumys istese, qazir jalǵyz óziń ǵana jasaı alasyń, bárin tehnıka jasap beredi, tek kompıýtermen jumys isteýdi bilseń bolǵany», deıdi ol.
Tanystyrylym barysynda Sh.Aımanov atyndaǵy "Qazaqfılm" AQ bas redaktory Dıdar Amantaı ortalyqtyń búgingi jáne erteńgi jumys barysymen bólisti. «Biz byltyr «Er Tóstik pen Samruq qus» atty qazaq kıno tarıhyndaǵy tuńǵysh anımatsııalyq tolyq metrajdy fılmdi óndiriske jiberdik. Bul buǵan deıin qazaq kıno tarıhynda bolǵan emes. Sonymen qatar, «Qazaq eli» atty jasóspirimderge arnalǵan 50 bólimnen turatyn anımatsııalyq tarıhı-tanymdyq serıaldy óndiriske jiberdik. Bul serıalda Jánibek pen Kereı handardan bastap búgingi kúnge deıingi ýaqytty tolyq qamtıtyn tarıh kórsetiletin bolady. Ár serııa bes mınýttan turady. Byltyr biz alty jobany aıaqtasaq, bıylǵy jyly «Qazaq ertegileri» atty 5 anımatsııalyq jobany óndiriske jiberemiz. Búgingi bizdiń jasap jatqan sharýalarymyz qazaq anımatsııasynyń qaıta túleýi dep aıtýǵa bolady», dedi ol.
Ol sonymen qatar, búgin tusaýkeseri ótken móltek fılmder eki aptadan keıin telearnalardan kórsetiletin bolady dedi.
