Almatyda jańa 190 trolleıbýs satyp alynady

ALMATY. QazAqparat - Almaty qalasy ákiminiń orynbasary Serik Qusaıynov brıfıng barysynda trolleıbýs parkin modernızatsııalaý týraly aıtty, dep habarlaıdy QazAqparat tilshisi.

«Almatylyqtar arasynda trolleıbýstar úlken qurmetke ıe. Kóliktiń bul túri qalaǵa qajet, biraq jańarǵan nusqada. «Almatyelektrotrans» parkin jańartý týraly ýáde oryndalady»,- deıdi ol.

Ákim orynbasarynyń aıtýynsha, sońǵy ret Almaty úshin trolleıbýstar 2012 jyly satyp alynǵan. Qazirgi ýaqytta qala boıynsha 215 kólik jumys isteıdi, onyń ishinde 34 trolleıbýsty esepten shyǵarý josparlanýda.

«Búginde trolleıbýs parki 165 tehnıka shyǵatyn toǵyz baǵytqa qyzmet kórsetedi. Aı saıyn jolaýshylar aǵyny shamamen 2,5 mln adam. Sondaı-aq jergilikti atqarýshy organdardyń AET óteıtin bank qaryzy esebinen 190 jańa trolleıbýs satyp alý múmkindigi qarastyrylyp jatyr», - dedi spıker.

Sonymen qatar, qalada trolleıbýstardyń júrý jolynda 41 shaqyrymnan astam qoldanystaǵy kabelder aýystyryldy. 600-den astam jańa tirek ornatyldy, 172 shaqyrym baılanys jelisi qaıta jańartyldy. Bul jumystar trolleıbýstardyń úzdiksiz jumys isteýi úshin jasaldy.

«2021 jyldyń tamyz aıynda Seıfýllın kóshesindegi 1-vokzaldan Raıymbek dańǵylyna deıingi trolleıbýstardyń baılanys jelileri aýystyryldy. Búginde osy ýchaskede baılanys jelileri úshin kronshteınderdi ornatý jumystary júrgizilýde. Sonymen qatar, Áýezov kóshesi boıymen Gogol kóshesinen Tımırıazev kóshesine deıingi baılanys jelilerin aýystyrý jumystary bastaldy. Jobanyń aıaqtalý merzimi – 2022 jyl»,- dedi ákimdik ókili.