Almatyda «Jan jylýy» baǵdarlamasy aıasynda ekinshi aktsııa ótti
/strong>Naýryzdyń 16-sy. QazAqparat /Názıra Eleýhan/- Búgin Almatyda Qazaq qatynas joldary ýnıversıtetinde «Jan jylýy» qaıyrymdylyq aktsııasy ótti,
dep habarlaıdy QazAqparat.
Atalmysh sharadan túsken qarajattar «Januıa» balalar kesheniniń tárbıelenýshisi 5 jastaǵy Egorov Mark pen Almaty oblysy Jambyl aýdany, Qasymbek aýylynyń turǵyny 10 jastaǵy Nurlan Shoqannyń emdelýlerine jáne operatsııa jasaýǵa aýdarylatyn bolady.
"Búgingi aktsııany Naýryz merekesi qarsańyna qaraı ótkizip otyrmyz. Bul mereke tek qana kóktem merekesi emes, bul kez - kómekke zárý adamdarǵa qaıyrymdylyq ister jasaý, kómek kórsetý, qol ushyn beretin ýaqyt. Biz ata-baba dástúrin saqtap qana qoımaı, ósip kele jatqan jastardy sol rýhta tárbıeleýimiz qajet. Biz eki mıllıon teńgeden astam qarajat jınaýdy josparlap otyrmyz. Oǵan óz úlesin meniń otbasym, ujymym qosyp otyr. Sondaı-aq bul sharaǵa Qazaqstandaǵy ǵana emes, Reseıdegi dostarym da atsalysyp jatyr. Biz óz bastamamyzben «Jan jylýy» baǵdarlamasynyń jetekshilerine shyqtyq. Mundaı ıgi isti qazaqstandyqtardyń ár qaısysy qoldaıdy degen senimdemin", dedi Qazaq qatynas joldary ýnıversıtetiniń rektory Amangeldi Omarov.
Qazaqstan ulttyq telearnasynyń áleýmettik baǵdarlamalar shyǵarmashylyq birlestiginiń jetekshisi Sáýle Jırenshına habar Naýryz merekesi qarsańynda kórsetiledi dep habarlady. «Búgingi kúni qoǵam ómirinde teledıdardyń alatyn orny úlken. Televıdenıe kóptegen áleýmettik jobalarǵa atsalysyp, qatysyp keledi jáne BAQ-nyń oǵan úles qosatyn ózindik bir áleýmettik róli bar. Bizdiń maqsatymyz bul kúni merekeni toılaýmen birge, qoǵamǵa «qaıyrymdylyq jasaý kerek» degen bizdiń halqymyzǵa tán qundylyqtardy dáriptep, nasıhattaýymyz qajet. Naýryz merekesi kezinde ertede joq- jitikke, otaý tige almaı júrgen jastarǵa, tipti jalshy-jaqybaıǵa deıin kómektesip, qol ushyn beretin. Sondyqtan biz, ata-baba dástúrin saqtaı otyryp, eki balaǵa kómek kórsetý maqsatynda búgin qaıyrymdylyq aktsııany uıymdastyryp jatyrmyz», dep atap ótti Saýle Jırenshına. Onyń aıtýynsha, «Jan jylýy» habar sońynan elimizdiń ár aımaǵynan redaktsııaǵa telefon qońyraýlary kelip túsedi. "Shalǵaıdaǵy aýyldardan telefon soǵyp, kóptegen januıalar taǵdyrdyń ár túrli jaǵdaıyna ushyraǵan jetim balalardy asyrap alǵymyz keledi deıdi. Habar shyqqaly jarty jyldyń ishinde tórt bala ózderiniń jańa otbasylaryn tapty", dedi ol.
Sharaǵa atsalysýshy elimizdiń halyq ártisi Eskendir Hasanǵalıev: "Múmkindigi bar árbir qazaqstandyq kómekke zárý adamdarǵa kómegin aıamaý kerek", dep atap ótti.
Aktsııaǵa Qazaqstan estrada juldyzdary men qoǵam qaıratkerleri qatysty. Ártister ánmen shashý shashyp, kelýshiler qarjylaı eki balaǵa óz kómekterin kórsetti.
