Almatyda jambasy synǵan 80 jastaǵy keıýanaǵa sátti operatsııa jasaldy

ALMATY. QazAqparat - Almatyda jambas súıegi synǵan soń bulshyq etteri semip, eki aıdan astam ýaqyttan beri tósekke tańylyp qalǵan 80 jastaǵy ájeı Ortalyq qalalyq klınıkalyq aýrýhanaǵa jetkizildi, dep habarlaıdy QazAqparat tilshisi.

Klınıkanyń ortopedııa bólimi meńgerýshisi Qanat Táýekelov keıýananyń oń jaq jambas býynyn almastyryp, kúrdeli ota jasady. Bıopolıarlyq endoprotezdeý dep atalatyn operatsııa mindetti áleýmettik medıtsınalyq saqtandyrý paketi sheńberinde jasaldy.

«Býyn endoprotezine arnalǵan zamanaýı materıaldar óte berik bolyp keledi ári adam aǵzasyna tez beıimdeledi. Bul materıaldar orta eseppen alǵanda 15-20 jyl, kóp jaǵdaıda 30 jylǵa deıin qyzmet etedi. Tozǵan soń endoprotezdi jańasyna aýystyrýǵa bolady. Bul operatsııa 45 mınýtqa sozyldy. Patsıent ekinshi kúni-aq otyra bastady, bul otanyń sátti ótkenin bildiredi», - dedi dáriger.

Qazir keıýana reabılıtatsııanyń ekinshi kezeńinen ótip jatyr.

Ortalyq klınıkalyq aýrýhanyń reabılıtatsııa bólimi meńgerýshisi Aıgúl Tórequlovanyń aıtýynsha, reabılıtatsııa robottandyrylǵan «Lokomat» ortopedııalyq trenajerynyń kómegimen júrgiziledi.

«Adam organızmi ınsýlt, mı kemigi men mı jaraqatynan keıin, jambas, tize býyndaryn almastyrǵan soń júrý qabiletin joǵaltady. Atalǵan joǵary tehnologııalyq qondyrǵy olardy júrýge beıimdep, aıaqqa turǵyzýǵa múmkindik beredi», - dedi bólim meńgerýshisi.

Qartaıǵanda óz betinshe júrip-turýǵa múmkindik syılaǵan dárigerlerge ájeı dán rıza.

«Júre almaı qalǵan soń saryýaıymǵa salyndym. Bir qadam jasaýdyń ózi muń boldy. Maǵan osynsha qýanysh syılaǵan bilikti dárigerler men jany meıirimge toly medbıkelerge aıtar alǵysym sheksiz», - dedi apa.

Medıtsınalyq saqtandyrý qory Almaty fılıalynyń dırektory Tileýhan Ábldaev qazirgi tańda mundaı joǵary tehnologııaly operatsııalar aqysy MÁMS arqyly tólenetinin atap ótti.

«Qaladaǵy medıtsına uıymdarynyń materıaldyq-tehnıkalyq bazasy men bilikti mamandardyń arqasynda jambas pen tize býyndaryn almastyrý, júrekke dıfebrıllıator qoıý, bas súıek ishindegi arterııalarǵa stent qoıý, anevrızmge shaldyqqan tamyrǵa endovaskýlıarlyq embolızatsııa jasaý syndy taǵy da basqa kúrdeli ota túrlerin jasaýǵa múmkindik beredi. Olardyń quny 1,5-6 mln teńge aralyǵyn quraıdy», - dedi Tileýhan Ábildaev.