Almatyda jalpy somasy 3 mln teńgeni quraıtyn jalǵan aqsha jasaǵandar sottaldy

NUR-SULTAN. QazAqparat - QR Qarjy mınıstrligi Qarjy monıtorıngi komıtetiniń Almaty qalasy boıynsha Ekonomıkalyq tergeý departamenti qyzmetkerleri qala aýmaǵynda jalpy somasy 3 mln. astam teńgeni quraıtyn 500 jáne 5000 teńge nomınaldarynda jalǵan aqsha daıyndaý jáne ótkizýmen aınalysqan úsh adamnan turatyn qylmystyq topqa qatysty sotqa deıingi tergeýdi aıaqtady.

Bul týraly QazAqparat Qarjy mınıstrliginiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, tekseris barysynda buryn sottalǵan bir top azamattyń aldyn-ala kelisim boıynsha QR Ulttyq bankiniń jalǵan banknotalaryn daıyndap, ótkizý maqsatynda jasyryn tseh uıymdastyrǵany anyqtaldy.

Sonymen, qylmystyq toptyń turǵylyqty jerindegi jalǵan aqsha jasaıtyn tsehqa beıimdelgen páterdi tintý kezinde úsh noýtbýk, túrli-tústi prınterler, eritkishter, ýltrafıolet jaryqtandyrǵysh sham, lamınator, 500 jáne 5000 teńge nomınalyndaǵy sý tańbasynyń izderi bar klısheler, sý tańbasyn yǵystyrýǵa arnalǵan tyǵyzdaǵysh, boıaý quıylǵan bótelkeler, flesh-jad quraldary tárkilenip alyndy.

Jedel-izdestirý is-sharalarynyń nátıjeleri boıynsha tárkilengen jalǵan banknottardyń jalpy somasy 308 000 teńgeni quraıtyn 85 dana boldy.

Qylmystyq top músheleri ustalar aldynda vanna bólmesinde jalǵan aqsha túrindegi zattaı dáleldemelerdi órtep úlgergen.

«Úsh aıyptalýshy da QR QK 231 baby, 2-b., 1-t. (adamdar tobynyń aldyn ala sóz baılasýymen jalǵan aqsha nemese baǵaly qaǵazdar jasaý, saqtaý, alyp ótý nemese ótkizý) sáıkes kináli dep tanylyp, olarǵa 6 jyldan 9 jylǵa deıin ártúrli merzimge bas bostandyǵynan aıyrý jazasy taǵaıyndaldy»,-delingen QR QM QMK baspasóz qyzmetiniń málimetterinde.