Almatyda jalǵyzbasty áıeldiń úıine qaraqshylyq shabýyl jasaldy
ALMATY. Qazaqparat – Almatyda jeke úıge qaraqshylyq shabýyl jasaǵandar ustaldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, qaraqshylyq shabýyl túngi saǵat úsh shamasynda bolǵan.
Qaısenov kóshesindegi úılerdiń birine úsh adam basyp kirgen.
«Belgili bolǵandaı, olar aldyn ala belgilengen jospar boıynsha áreket etken. Shabýyl jasaǵandar úıde jalǵyzbasty áıeldiń turatynyn bilgen. Kúdiktilerdiń rólderi naqty bólingen: ekeýi qylmystyq nıetterin júzege asyrdy, bireýi jaǵdaıdy baqylaý úshin qaqpanyń janynda qaldy. Er adamdar úı ıesin soqqyǵa jyqqan. Olar ózderimen birge quny 2 mıllıon teńgeden asatyn zergerlik buıymdardy alyp ketken», – dedi Medeý aýdandyq polıtsııa basqarmasynyń bastyǵy Dáýren Ótebaev.
Onyń aıtýynsha, aýyr qylmysty ashý maqsatynda qalalyq krımınaldyq polıtsııa qyzmetkerlerimen kúsheıtilgen jedel-izdestirý toby quryldy.
«Qaraqshylyq shabýyl ashyldy. Úsh kúdiktiniń ekeýi ustaldy. Qashqyndy qolǵa túsirý ýaqyt enshisinde. 37 jastaǵy J. esimdi azamat, sonymen qatar 25 jastaǵy Ts. esimdi azamat qamaýǵa alyndy. Ekeýi de buryn bótenniń múlkin urlaǵany úshin jazasyn ótegen»,-deıdi polıtsııa ókili.
Ustalǵandardyń sózinshe, olar shabýyl jasamas buryn úıdi birneshe kún baqylaǵan.
Tapqan oljasy - ózara bólisip alǵan asyl tas. Keıbireýin satqan, al túsken aqshany óz qalaýyna jumsaǵan.
