Almatyda jalǵan nómir taqqan qymbat kólik ustaldy
ALMATY. QazAqparat - Almatyda jalǵan nómir taqqan jol talǵamaıtyn «Toyota Land Cruiser-200» avtokóligi ustaldy, dep habarlaıdy QazAqparat tilshisi.
Jol saqshylary Tımırıazev pen Jeltoqsan kósheleriniń qıylysynda Toyota Land Cruiser-200 avtokóligin toqtatty. Elıtalyq jol talǵamaıtyn kólik birden mamandandyrylǵan avtoturaqqa jetkizildi.
Zańbuzýshylyqqa jol bergen 60 jastaǵy kólik júrgizýshi jalǵan nómir men arnaıy jaryq jáne dybystyq dabyldy ne úshin ornatqanyn túsindire almady. Sondaı-aq, ol jekemenshik kólikti arnaıy kólik retinde kórsetkisi kelgen.
«Mundaı kólik júrgizýshilerinde jaýapkershilik múlde joq. Óıtkeni, kólik ıesi sanaly túrde jol erejelerin buzyp, jalǵan nómir ornatyp kóshege shyǵady»-deıdi jol saqshylary.
«Jol talǵamaıtyn kólik júrgizýshisine Ákimshilik quqyq buzý týraly kodekstiń 590-baby 3-tarmaǵyna sáıkes hattama toltyryldy.Sondaı-aq, arnaıy dybystyq qurylǵylardy ruqsatsyz kólikke ornatqany úshin jazalanady. Onyń kóligi qaladaǵy mamandandyrylǵan kólik turaǵyna jetkizildi», - dedi Almaty qalasy PD ákimshilik polıtsııa basqarmasynyń mamandandyrylǵan batalon komandıri Serikjan Ábjanov.
