Almatyda jalǵan qyzmetterdi paıdalaný arqyly salyq tóleýden jaltarmaq bolǵan azamatsha ustaldy
ALMATY. QazAqparat - Almatyda jalǵan qyzmetterdi paıdalaný arqyly salyq tóleýden jaltarmaq bolǵan azamatsha ustaldy. Ol jalǵan qyzmet pen taýardy satyp alyp, salyq organdaryna shyǵynyn mol etip kórsetýge tyrysqan. Bul týraly qalalyq Salyq depratamentiniń baspasóz qyzmetinen habarlady.
«Kásiporyn basshysy qurylys materıaldaryn satyp alý týraly jalǵan býhgalterlik qujattar rásimdegen. Keıin osynyń esebinen salyq organdaryna 739 mln. teńge kóleminde shyǵyn shyǵarǵany jaıly deklaratsııa toltyrǵan. Salyq departamenti qyzmetkerleriniń tekserýi barysynda kásiporyn basshysynyń jalǵan kompanııamen jumys istegeni ári atalǵan qujattardyń jalǵan ekendigi anyqtaldy», - dedi baspasóz qyzmetinen. Atalǵan derek boıynsha qalalyq Ekonomıkalyq qylmysqa jáne sybaılas jemqorlyqqa qarsy kúres departamenti qylmystyq is qozǵady. Sot sheshimimen kásiporyn basshysy birneshe jylǵa bas bostandyǵynan aıyryldy. Sondaı-aq kompanııaǵa keltirgen zalaly úshin oǵan 90,4 mln. teńge kóleminde aıyppul salyndy. Qalalyq Salyq basqarmasynyń baspasóz qyzmetiniń habarlaýynsha, qalada túrli mehanızmder arqyly salyqtyń kólemin az kórsetetin salyq tóleýshiler kóbeıgen. Olar jalǵan qyzmetter men taýarlardy satyp alý týraly jalǵan qujat kórsetip, sol arqyly kompanııanyń shyǵyndaryn shamadan tys kóp kórsetýge tyrysady. Sóıtip tólenetin salyqty da azaıtady. Bylyqtyń beti ashylǵan kezde qyzmet kórsetken organ múlde joq bolyp shyǵady. Esesine negizgi paıda kórýshi - jalǵan qyzmetterdi satyp alýshy jaýapkershilikten qutylyp ketedi. Qazir Salyq departamenti bul baǵyttaǵy jumystardy kúsheıte túsýde.
