Almatyda jalǵan aqsha jasaýmen aınalysqan eki adam sottaldy
ALMATY. QazAqparat - Almatyda jalǵan aqsha jasaýshylar ustaldy. Ustalǵan ekeýdiń biri - 5 jyl, ekinshisi 3 jyl 6 aıǵa sottaldy, dep habarlaıdy QazAqparat tilshisi.
QR Qarjy mınıstrligi Qarjylyq monıtorıngi komıtetiniń málimetine qaraǵanda, kúdiktiler Almaty qalasy men Almaty oblysy aýmaǵynda nomınaly 10 000 teńge bolatyn jalǵan banknotalardy daıyndaý jáne ótkizýmen aınalysqan. Jaqynda eki tulǵadan quralǵan qylmystyq topqa qatysty sotqa deıingi tergeýdi aıaqtaldy.
Tekserý sharalaryn júrgizý barysynda bir top tulǵanyń aldyn-ala kelisim boıynsha ótkizý maqsatynda Qazaqstan Respýblıkasy Ulttyq bankiniń jalǵan banknotalaryn daıyndaıtyn astyrtyn tsehty uıymdastyrǵany anyqtaldy.
Jalǵan aqsha daıyndaıtyn tseh retinde jabdyqtalǵan páterdi tintý barysynda noýtbýk, túrli-tústi prınter, sýtańbasy bar arnaıy qaǵaz, boıaý flakondary, eki jaǵynda 10000 teńgelik sýretteri (blankileri) bar sandyq faıldar, banknot pen oıý-órnektiń ornyn almastyratyn folgadan jasalǵan lentalar, keńse taýarlary jáne quny 220 000 teńgeni quraıtyn jalǵan qaǵaz aqsha tárkilenip alyndy.
«Sot úkimimen aıyptalýshylar QR QK 231 babynyń 2-b. sáıkes (jalǵan aqsha nemese baǵaly qaǵazdar jasaý, saqtaý, alyp ótý nemese ótkizý) kináli dep tanylyp, astyrtyn tseh uıymdastyrýshylardyń birinshisine 5 jyl, ekinshisine 3 jyl 6 aı merzimge bas bostandyǵynan aıyrý jazasy taǵaıyndaldy.
