Almatyda jalǵa beriletin páterge suranys joǵary - qaýymdastyq ókilderi

ALMATY. QazAqparat – Jylda tamyz aıynda jalǵa beriletin páter aqysy qymbattaıdy, sebebi suranys joǵary. Mundaı pikirdi onlaın brıfıng barysynda Qazaqstan rıeltorlar qaýymdastyǵynyń mamandary aıtty, dep habarlaıdy QazAqparat tilshisi.

Qazaqstan rıeltorlarynyń ózin-ózi retteıtin qaýymdastyǵy prezıdentiniń keńesshisi Nına Lýkıanenko jalǵa beriletin turǵyn úı baǵasy neden qalyptasatynyn aıtty.

«Naryqtyq ekonomıka suranys pen tólemge qabiletti usynystyń áserinen baǵany qalyptastyrýǵa múmkindik beredi. Jasyratyny joq, sońǵy aılarda jaldaý quny aıtarlyqtaı ósti, biraq bári umytyp ketetin taǵy bir ekonomıkalyq protsesti este ustaǵan jón. Ókinishke qaraı, bıyl 15% aıasynda ınflıatsııa dálizi jarııalandy. Bul baǵanyń barlyǵyna da ósetinin bildiredi, al jaldaý – naryqta usynylatyn qyzmet», - deıdi spıker.

Birikken rıeltorlar qaýymdastyǵynyń múshesi Orynbasar Sataev óz kezeginde, jalǵa alatyn páterlerge suranys joǵary ekenin atap ótti.

«Birinshiden, suranys bar. Sáıkesinshe baǵa da ósedi. Mysaly, Almatynyń Bostandyq, Almaly, Medeý aýdandarynynan páter jaldaǵysy keletinderdiń sany óte kóp. Sebebi, joǵary oqý oryndary osy atalǵan aýdandarda shoǵyrlanǵan. Jalpy, baǵanyń kóterilýi – álemdik tendetsııa, tek bizdiń elde ǵana emes. Bul máseleni sheshý úshin jataqhanalar kóptep salynýy kerek. Baǵa tapshylyqtan kóterilip jatyr», - deıdi maman.