Almatyda jaldamaly páterlerdiń baǵasy ósken
Rıeltorlyq agenttikterdiń málimetinshe, sońǵy jyly jalǵa alýǵa suranys ósken, tıisinshe, bul baǵanyń ósýine de ákeldi.
«Almatynyń bir Áýezov aýdanynda 2021 jyldyń qyrkúıeginen bastap 2022 jyldyń maýsymyna deıin aýdany 35-45 sh.m bir bólmeli páterler 130 myńnan 170 myń teńgege deıin jalǵa beriledi. Salystyrmaly túrde alǵanda, 2020 jyldyń qyrkúıegi men 2021 jyldyń qyrkúıegi aralyǵynda jaldamaly páterlerdiń aı saıynǵy baǵasy 90 myńnan 140 myń teńge aralyǵynda ózgerip turdy. Osyǵan uqsas 2019 jáne 2020 jylǵy qyrkúıek aılarynda jaldaý quny 80 myńnan 130 myń teńgege deıin bolǵan. Sońǵy aılarda baǵalar áli óz deńgeıinde tur. Baǵalar tómendese de az baǵaǵa tómendeıdi. Kúzge jaqyn, jańa oqý jylynyń basynan bastap baǵalar qaıtadan ósýi múmkin», - dedi QazAqparat tilshisine «Apartamenty Almaty» JShS jyljymaıtyn múlik agenttiginiń rıeltory Erlan Dúısenqulov.
Rıeltor sondaı-aq baǵanyń qymbattaýymen turǵyn úıdi jalǵa alýdyń qıyndaǵanyn aıtty. Onyń ústine menshik ıeleri páterge kirgen kezde klıentterden 50 myń teńgeden joǵary mólsherde depozıt salýdy jıi talap ete bastaǵan.
Almatyda turǵyn úıge suranys joǵary bolyp tur. Negizinen, megapolıstegi rıeltordyń qyzmetine qalany bilmeıtin nemese nashar biletin syrttan keletin azamattar júginedi.
«Sońǵy aılarda týrıster men basqa elderden kelgen azamattardyń kóbeıýimen turǵyn úı quny 250 myń teńgege deıin ósti. Mysaly, bir kúnde maǵan basqa elderden kelgen bes adam qońyraý shalady. Ótken apta ishinde men Reseı, Ýkraına jáne Belarýs azamattaryna páter tapsyrdym. Olardyń kópshiligi páterdi úsh aıdan alty aıǵa deıin jalǵa alý týraly kelisimshart jasady», - dedi rıeltor.
Erlan Dúısenqulov jalǵa beriletin turǵyn úıdiń baǵasy aýdannyń ornalasqan jerine baılanysty ekenin atap ótti. Ol sondaı-aq Almatydaǵy jaldamaly páterler boıynsha aralyq taldaý jasap berdi. Mysaly, Áýezov aýdanynda aýdany 35-40 sharshy metr bolatyn bir bólmeli páterdi jalǵa alý 130 myń jáne odan joǵary turady. Medeý aýdanynda dál osyndaı páterdi 25% - ǵa qymbat baǵamen alýǵa bolady. Bostandyq jáne Almaly aýdandarynda 15%-ǵa qymbat. Alataý aýdanynda osyndaı aýmaǵy bar páterler 15% - ǵa salystyrmaly túrde arzan. Jetisý aýdanynda 10%-ǵa, Túrksib aýdanynda 20-25%-ǵa arzan.
«Jalǵa beriletin turǵyn úıdiń baǵasyna birneshe faktor áser etedi, olar stýdentterdiń kelýi, dollar baǵamy, ınflıatsııa. Men páterdi jalǵa berý jáne satý salasynda shamamen 15 jyl jumys isteımin. Osy ýaqyt ishinde turǵyn úı naryǵy qatty ózgerdi. Keıde tipti páter izdeýshiler jaǵdaıdy ózderi kúrdelendirip jiberedi. Al turǵyn úı ıeleri jaǵdaıdy paıdalanyp, naryqta usynylǵan baǵalarǵa qaramaı, óz baǵalaryn qoıady. Árıne, klıent osyndaı baǵalardy kórip, ony qalypty baǵa dep sanaıdy. Sondaı – aq, keıbir úı izdegen adamdar turǵyn úı izdeý qyzmetterin durys paıdalanbaıtynyn atap ótkim keledi», - dedi rıeltorlyq agenttiktiń ókili.
Eske salaıyq, memleket muqtaj otbasylarǵa jaldamaly páter aqysynyń 50%-yn tóleıtinin
jáne Almatydaǵy kóppáterli turǵyn úılerdiń jartysynan kóbi jańa nysanǵa aýysqanyn habarlaǵan bolatynbyz.
