Almatyda jaqsylyq pen meıirimdilik aktsııasy bastaldy

ALMATY. QazAqparat - Almatyda búgin qalanyń 1000 jyldyq mereıtoıyna oraı, jaqsylyq pen meıirimdilik aktsııasy bastaldy. «Almatynyń 1000 jyldyǵyna - 1000 ıgilikti is» Jospary aıasynda qaladaǵy G38 jastar uıymy bıznes-qaýymdastyq, úkimettik uıymdar jáne belsendi qala turǵyndarymen birlese otyryp, muqtaj jandarǵa qaıyrymdylyq kómek kórsetý jumystaryn qolǵa almaq nıette.

Aktsııanyń maqsaty - Uly Otan soǵysy ardagerleri men múgedekterine, tyl eńbekkerlerine, jalǵaz basty qarttarǵa, múmkindigi shekteýli jandarǵa, jetimder men múgedek balalarǵa, áleýmettik az qamtylǵan jáne kóp balaly otbasylaryna qaıyrymdylyq kómek kórsetý.

Búgin, Mektep oqýshylary saraıynda bastaý alǵan bul aktsııa, endi jyl sońyna deıin jalǵasatyn bolady.

Jalpy, «1000 ıgilikti is» aktsııasy aıasynda belsendiler qaıyrymdylyq negizde azyq-túlik sebetterin taratyp, úıler men aýlalardy tazartady, shıpajaılarǵa arnalǵan joldamalar jáne dári-dármek sertıfıkattaryn usynady. Sondaı-aq, aýrýhanalarda emdeýlge, gazetterge jazylýǵa, áleýmettik beıimdelgen dúkenderden tegin nan alyp turýǵa,  «Meıirimdi júrekpen» ortalyǵy arqyly kıim-keshek, turmystyq zattar, buıymdar, tez buzylmaıtyn azyq-túlikter alyp turýǵa kómektesedi jáne merekelik kontsertter men ekskýrsııalar uıymdastyrady.

Odan basqa, belsendiler joǵary oqý oryndary men tehnıkalyq jáne kásiptik bilim beretin oqý oryndarynyń túlekterin jumysqa ornalastyrý, «Keńes» ortalyǵy arqyly olarǵa zańdyq aqyl-keńester berý, sondaı-aq, atalǵan oqý oryndarynda daıyndyq kýrstaryn uıymdastyrý jumystaryn da qolǵa alady.   

Aldaǵy ýaqytta, jumys jospary kelip túsken usynystar men pikirler negizinde ázirlenetin bolady.