Almatyda jahandyq jylyný máselelerine arnalǵan aktsııa ótti
ALMATY. Qazannyń 28-i. QazAqparat /Ernar Beken/ - Ústimizdegi jylǵy qazannyń 24-de álemniń barlyq iri qalalarynda jahandyq klımattyń ózgerýine kópshilik nazaryn aýdartýdy maqsat tutqan «350» aktsııasy ótti. Bul sharadan Almaty qalasy da shet qalmady.
Kóktóbe baǵynda «Biz 350 úshin» degen taqyryppen iri kólemde jastar aktsııasy uıymdastyryldy, dep habarlaıdy QazAqparat.
350.org klımattyq ózgerister qozǵalysynyń Jahandyq kúnine arnalǵan sharaǵa Almatynyń 400-deı stýdenti qatysty. Jastardyń osylaı bas qosýyndaǵy basty maqsat - bıylǵy jyldyń jeltoqsan aıynda Kopengagen qalasynda aýa-raıynyń ózgerýine baılanysty ótetin sammıtte kóshbasshy elderdiń prezıdentterin atalǵan másele boıynsha oń sheshimder qabyldaýǵa shaqyrý.
Bul sharanyń ońtústik astanada ótýine Greens.kz qozǵalysy muryndyq boldy. Al Kóktebede uıymdastyrylýy da beker tańdalǵan joq. Bul Almatydaǵy eń ekologııalyq taza oryn bolyp esepteledi. Jınalǵan jastar tizbektelip, óz denelerimen qozǵalystyń sımvoly - 350 sanyn órnektep shyǵardy. Bul kórinis 350.org jahandyq qozǵalysynyń saıtynda jarııalandy jáne búkil álemnen kelip túsken osyndaı 5000 sýrettiń ishinen eń úzdik 20 fotosýrettiń qataryna iligip, aktsııa sheńberinde Nıý-Iorktiń kóshelerindegi úlken monıtorlarynda kórsetildi.
Shara aıasynda eń úzdik «Biz 350 úshin» joldaýyna baıqaý jarııalandy. Jıynǵa qala ákiminiń orynbasary Serik Seıdýmanov pen Kóktóbeniń ákimshilik ókilderi de tikeleı atsalysty.
