Almatyda «Jahandaǵy zamanaýı qazaqstandyq mádenıet» jobasy boıynsha qurylǵan jumys tobynyń alǵashqy otyrysy ótti
ALMATY. QazAqparat - Almatyda QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda aıtylǵan mindetterdiń biri - «Jahandaǵy zamanaýı qazaqstandyq mádenıet» jobasy boıynsha qurylǵan jumys tobynyń alǵashqy otyrysy ótti, dep habarlaıdy QazAqparat tilshisi.
Jıynda QR Prezıdenti ákimshiligi Іshki saıasat bóliminiń meńgerýshisi Aıda Balaeva atalǵan joba álemniń mańdaıaldy týyndylary qataryna Táýelsizdik jyldary jaryqqa shyqqan Qazaqstannyń mádenı qundylyqtaryn qosýǵa, sondaı-aq, bolashaqta onyń álemdik mádenıettiń bir bólshegine aınalýyna jol ashatynyn aıtty.
Іriktelip alynǵan týyndylar elimizde ómir súrip jatqan barlyq mádenıetter men ulttardyń ultaralyq palıtrasyn qamtýy kerek.
Osy sala boıynsha qurylǵan jumys toby mádenı týyndylardy irikteý boıynsha uıymdastyrý jumystaryn júıeleýdi bastamaq. Jumys tobynyń múshesi ǵalym Erlan Saıyrov «bul joba halyq arasynda áleýmettik optımızmdi týdyrady» degen pikir aıtty.
«Jahandyq zamanaýı qazaqstandyq mádenıet» atty jobanyń birinshi otyrysy ótti. Bul jerdegi negizgi maqsat - barlyq shyǵarmashylyq ortalyq ókilderiniń basyn qosyp, Elbasy mindetin júzege asyrý. Ol mindet - kelesi jyldan bastap, Birikken Ulttar Uıymynyń alty tilinde qazaq tili, ádebıeti, mádenıeti, óner, teatr, kıno salasy boıynsha úzdik týyndylardy halyqaralyq deńgeıge shyǵarý. Bul joba halyqtyń arasynda áleýmettik optımızmdi týdyrady. Sonymen qatar, bolashaqta Qazaqstannyń strategııalyq resýstaryn jasaıdy dep oılaımyn. Óner salasynda jumys toby quryldy, sol jumys toby aıasynda sarapshylar qurylady. Sarapshylar toby short-paraq arqyly jumys isteıdi. Naqtyraq aıtqanda, Qazaqstandaǵy ónerdiń 4 baǵyty boıynsha, eń úzdik týyndardy jınaıdy. Sosyn, osy jyldyń ekinshi jartysynda búkilhalyqtyq talqylaýǵa usynylady. Talqylaýdan iriktelingen shyǵarmalar memlekettik komıssııaǵa jiberiledi», - dedi jumys tobynyń múshesi, saıasattanýshy Erlan Saıyrov.
KSRO jáne Qazaqstan Jazýshylar odaǵynyń múshesi Lıýbov Shashkova atalǵan jobanyń basty maqsatynyń biri qazirgi Qazaqstannyń avtorlary men shyǵarmalaryn tanymal etý ekenin aıtty.
«Álemde basylyp jatqan, teatr sahnalarynda qoıylyp jatqan, mýzykalyq alańdarda oryndalyp jatqan korıfeılerimizdi tanımyz, klassıkamyzdy, uly folklorymyzdy bilemiz, al Qazaqstanda táýelsizdik jyldary qandaı týyndylar jaryqqa shyqty, jastar ne jazdy, mine, osyny tanytý - mindet», - dedi ol.
Jıynda zamanaýı mádenıettiń úzdik úlgileriniń tizbesin jasaý úshin jumys tobyna qajet irikteýdiń naqty krıterııleri aıtyldy. Naqtyraq aıtqanda, birinshiden, týyndy Qazaqstannyń táýelsizdigi kezeńinde dúnıege kelgen bolýy shart, ekinshi, qoǵamda halyq moıyndaǵan, tanylǵan avtorlar bolýy kerek. Úshinshi, jaryq kórgen týyndy (kitap, fılmografııa, teatr qoıylymy, kórmelerge qatysý t.b.) qoǵamda tanymal bolýy tıis. Tórtinshi, týyndy jańashyldyǵymen, biregeıligimen, zııatkerligimen, obrazdylyǵymen, ulttyq bolmysymen erekshelenýi tıis. Besinshi, týyndy joǵary kásibı deńgeıge, mádenı, ádebı talǵamǵa, sahnalyq mádenıetke saı bolýy qajet. Altynshy, týyndy zorlyq-zombylyqty, dinı arazdyqty, nashaqorlyqty nasıhattamaýy tıis. Jetinshi, irikteý kezinde Qazaqstan aýmaǵynda turatyn barlyq mádenıet ókilderi, ulttyq palıtra eskerilýi qajet.
Aıta keteıik, týyndylardy irikteý 3 kezeń boıynsha júzege asyrylmaq. Týyndylarǵa tıisti saraptama men irikteý júrgizilgen soń, jumystardyń tizimi jumys tobynyń jalpy otyrysynda talqylanyp, Ulttyq komıssııanyń qaraýyna, bekitýine jiberiledi.
