Almatyda jaǵdaıy tómen 3690 balanyń jazǵy demalysyna 190 mln teńge bólindi
ALMATY. QazAqparat - Almatyda jaǵdaıy tómen otbasydan shyqqan 3690 bala jazǵy lagerlerde tegin demalady. Osy maqsatta qala bıýdjetinen 190 mln teńge bólingen.
Bul týraly QazAqparat tilshisine qalalyq Bilim berý basqarmasynyń Rýhanı-adamgershilik tárbıe jáne ózin ózi taný bólimi basshysynyń mindetin atqarýshy Taý Nurgúl aıtty.
Qazir qala syrtyndaǵy «Ogonek», «Spýtnık» jáne «Órnek» lagerlerinde jetim, jaǵdaıy tómen otbasy jáne kópbalaly otbasylardan shyqqan balalardyń alǵashqy aǵyny - 820 oqýshy alǵashqy aýysymda demalyp jatyr.
Mamannyń aıtýynsha, bıyl Almatyda 176 240 bala jazǵy demalys túrimen qamtylady. Almaty qalasy boıynsha 188 mektepte 313 mektep janyndaǵy lagerler jumys jasap, onda barlyǵy 26343 oqýshy demalady dep josparlanyp otyr. Sol sııaqty, qala syrtyndaǵy 27 jeke menshik lagerleri men Bilim basqarmasyna qarasty «Órnek» lageri balalardy qarsy alýǵa daıyn. Mektepishilik jáne qala syrtyndaǵy lagerlerden bólek az merzimge qosymsha demalys oryndary da qarastyrylǵan.
«Qalada 25 qosymsha bilim berý mekemesi jumys atqarady, olar 1499 úıirmege 31285 balany qamtysa, Jas týrıster stansasy saıahat saparyn, Jas natýralıster stansasy - «Ekpe kóshet» festıvalin, qalalyq sport jáne dene tárbıesi ortalyǵy kóptegen sporttyq sharalar uıymdastyryp, balalardy kúndik demalyspen qamtıdy. Sondaı-aq, jaz boıy Respýblıkalyq «Baldaýren» oqý-saýyqtyrý ortalyǵyna 100 ozat oqýshy tegin demalsa, 750 bala Almaty qalasy Týrızm basqarmasynyń uıymdastyrýymen Almaty qalasynyń kórikti jerlerin aralaý úshin 1 kúndik saıahatqa shyǵady. Sonymen qatar, osy maqsatta 620 oqýshy Astana qalasyna sapar shegedi», - dedi Nurgúl Taýqyzy.
