Almatyda jaǵdaıy aýyr 2 naýqas jasandy tynys alý apparatyna qosylǵan
ALMATY. QazAqparat – Almatyda koronavırýs juqtyrǵan 2 adamnyń jaǵdaıy aýyr. Bul týraly qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aıtty, dep habarlaıdy QazAqparat tilshisi.
«68 naýqastyń densaýlyq jaǵdaıy qanaǵattanarlyq. 10 eresek adamnyń jaı-kúıi ortasha aýyr. 2 eresek adamnyń jaǵdaıy aýyr. Olar ókpeni jasandy tynys alý apparatyna qosylǵan. Patsıentterdiń birinde ókpeniń obstrýktıvti sozylmaly aýrýy bar bolǵandyqtan onyń jaǵdaıy aýyr. Sonymen qatar onyń birqatar antıbıotıkke allergııasy bary anyqtaldy. Al ekinshi patsıentte ókpeniń eki jaqty pnevmonııasy bolǵandyqtan, onyń da jaǵdaıy aýyrlap otyr», - dedi Tileýhan Ábildaev.
Juqtyrǵandardyń arasynda 1 bala bar, onyń densaýlyq jaǵdaıy qazir qanaǵattanarlyq.
