Almatyda zeınetkerlerdi tonap kelgen 39 jastaǵy er adam ustaldy
ALMATY. QazAqparat - Almatyda zeınetkerlerdi tonaýmen aınalysqan ury ustaldy. 39 jastaǵy er adam egde tartqan áıel adamdardyń moınynan altyn alqalaryn julyp alyp ketip otyrǵan, dep habarlaıdy QazAqparat tilshisi.
Kúdikti tek egde tartqan áıelderdi tonaýmen aınalysqan. Ol ózine yńǵaıly sátti kútip, zeınetkerlerdiń moınynan altyn alqany julyp alyp, belgisiz baǵytqa qashyp ketip júrgen.
«Kúdikti — Reseı Federatsııasynyń týmasy R. esimdi azamat. Ol jalǵyz ózi qalanyń tómengi aýdandarynda áreket etken. Betine medıtsınalyq maska taǵyp alyp, kúndizgi ýaqytta da kisi tonaýmen aınalysqan. Ol kóshede ózine qaraı kele jatqan áıelderdiń áshekeılerin julyp alyp qashyp ketip otyrǵan. Keıin zergerlik buıymdardy lombardqa ótkizip, odan túsken qarajatty jeke qajettilikterine jumsaǵan. Aıta ketý kerek, R. esimdi azamat buryn sportpen aınalysqan jáne jyldam júgirý daǵdylaryn osy kásipke qoldanǵan. Kúdikti buryn tonaý jáne qaraqshylyq boıynsha sottalǵan. Ustalǵan er adamǵa qatysty QR QK-niń 191-baby (Tonaý) boıynsha sotqa deıingi tergeý jumystary tirkeldi. Ol Almaty qalasyndaǵy PD ýaqytsha ustaý ızolıatoryna qamaldy»,– dedi Almaty qalalyq PD krımınaldyq polıtsııa basqarmasynyń bastyǵy Erkin Іńkárov.
Qazirgi ýaqytta kúdiktiniń osyǵan uqsas tórt qylmystyq epızodqa qatysy bar ekendigi dáleldendi.
