Almatyda zeınetkerler arasynda bılıardtan el chempıonaty ótti
ALMATY. 28 sáýir. QazAqparat /Erlik Erjanuly/ - Búgin Almatyda bılıardtyń «Qurastyrmaly pıramıda» túrinen zeınetkerler arasynda 10 Qazaqstan chempıonaty óz máresine jetti.
26 sáýir kúni «Bastaý» bılıard klýbynda jalaýyn kótergen bul básekege Almaty, Kókshetaý, Qostanaı jáne Shymkent qalalarynan 30 sportshy qatysty. Olar jas ereksheligine qaraı 63-74 jastaǵylar, 75 jastan joǵarǵylar bolyp eki topqa jikteldi. Bılıard sportyn damytý jáne nasıhattaý, osy arqyly zeınetkerlerdiń arasyndaǵy baılanysty nyǵaıtý men damytý maqsatyndaǵy bul týrnır úzdik sportshylardy anyqtaýǵa baǵyttalǵan. Ony Týrızm jáne sport mınıstrliginiń Sport komıteti men Qazaqstannyń Bılıard sporty federatsııasy birigip uıymdastyrdy. Bul joly 75 jastan joǵarǵylar arasynda Abdýǵaı Bekjanov (Shymkent 1936 j.t.) chempıon atansa, Gennadıı Shahov (Almaty 1934 j.t.) pen Kerim Daýrbaev ( Shymkent 1936 j.t.) júldeger atandy. Al 63-74 jastaǵylar arasynda aqtyq synda kókshetaýlyq Marat Dosqojınnen basym túsken shymkenttik Abaı Ahmetov (ekeýi de 1944 j.t.) jeńimpaz atandy. Al onyń jerlesi Georgıı Pak (1948 j.t.) qola júldeniń ıesi boldy.
