Almatyda «zergerlik» ota jasaldy
ALMATY. QazAqparat - Almaty hırýrgtary adam qolyna biregeı ota jasady. Bul týraly qalalyq Densaýlyq saqtaý basqarmasynyń baspasóz hatshysy Leıla Keńesbaeva habarlady.
«Qalalyq jedel járdem kórsetý aýrýhanasyna osydan biraz buryn qolynyń saýsaqtaryn zaqymdaǵan naýqas kelip túsken bolatyn. Japa shegýshiniń aıtýynsha, úıinde qurylys júrgizip jatqan kezde ol qolyn jumys istep turǵan mıkserge salyp alǵan. Sonyń saldarynan onyń oń qolynyń saýsaqtary qatty zardap shekken», - dedi baspasóz hatshysy L.Keńesbaeva.
A.Syzǵanov atyndaǵy ulttyq hırýrgııa ortalyǵy men jedel járdem berý aýrýhanasynyń bilikti hırýrgtary jigittiń sińiri jyrtylǵan saýsaqtaryn qalpyna keltirdi. Ota jasaý kezinde mıkrohırýrgııalyq tehnologııa qoldanyldy.
Medıtsınada mundaı kúrdeli operatsııany mamandar «zergerlik jumys» dep ataıdy. Óıtkeni, kóbinese oǵan birneshe saǵat ýaqyt ketedi ári úlken uqyptylyqty qajet etedi.
«Qazir naýqastyń jaǵdaıy birqalypty. Onyń saýsaqtarynyń jumys qabileti anaǵurlym jaqsardy», - dedi L.Keńesbaeva.
