Almatyda zaýyt jumysshylaryna vaktsına salyndy
ALMATY. QazAqparat – Almatynyń ındýstrıaldy aımaǵyna ornalasqan kásiporyndardyń shaqyrýymen mobıldi ekpe brıgadalary «Almapaq» zaýytynyń jumysshylaryna vaktsına saldy, dep habarlaıdy QazAqparat tilshisi.
Ákimdiktiń taratqan derekterine súıensek, zaýytta vaktsına saldyrýǵa 30 adam jazylǵan. Olar vaktsınanyń eki komponentin de aldy.
«Biz qurǵaq qurylys qospalaryna arnalǵan qaǵaz shyǵaramyz. Óndiristi toqtatýǵa bolmaıdy, óıtkeni bizdiń ónim Ózbekstan men Qyrǵyzstanǵa da qajet. Sonymen qatar, bizdiń barlyq qyzmetkerlerimizdiń otbasy bar, sondyqtan olar ekpeni sanaly túrde alyp otyr. Men sáýir aıynda vaktsına aldym, keıinirek jumysshylarǵa usyndym. «Darhan» shaǵyn aýdanyndaǵy emhanaǵa ótinim berip, medıtsınalyq brıgada kelip, vaktsına saldy», – dedi zaýyt qyzmetkeri Aıdar Qasenov.
Bul – Almaty ındýstrıaldy aımaǵyndaǵy jumysshylar brıgadasy vaktsına alǵan alǵashqy ónerkásip kásiporny emes. Sáýir aıynda «Almaty elektr qalqany», «Hıýndaı Trans», «KSM Tehnovıd» pen «Maslo-del» zaýyttary ujymdary da jappaı vaktsınalaýdan ótken.
29 maýsymdaǵy jaǵdaı boıynsha Almatyda 438 930 adam vaktsına alǵan. Ótken táýlikte 10 398 adam vaktsınalandy. 60 jastan joǵary vaktsına alǵandar sany 74 656 adam.
Megapolıste medıtsınalyq uıymdarda, mektepterde, mádenıet, sport nysandarynda, bazar men qalanyń SOSO-da 208 vaktsına pýnktteri jumys istep tur. 1 256 adam jumyldyrylǵan 307 ekpe brıgadasy qyzmet atqarady.
