Almatyda Záýresh Esbergenqyzynyń "Jetpis jumbaq..." án keshi ótedi
ALMATY. Qyrkúıektiń 3-i. QazAqparat /Erlik Erjanuly/ - Almatydaǵy "Qazaqkontsert" zalynda qyrkúıektiń 10-y kúni ánshi, aktrısa, rejısser, "Qurmet" ordeniniń ıegeri Záýresh Esbergenqyzynyń "Jetpis jumbaq ..." dep atalatyn shyǵarmashylyq án keshi ótedi,
dep habarlaıdy QazAqparat.
Bıyl 70 jasqa tolǵan óner sheberiniń mereıtoılyq sharalary sáýirdiń 28-i Aqtaý qalasyndaǵy N.Jantórın atyndaǵy Mańǵystaý oblystyq mýzykalyq drama teatrynda bastalǵan bolatyn. Tórt jasynan bastap án shyrqaǵan Záýresh Esbergenqyzy respýblıkalyq estrada stýdııasynyń ánshilik jáne Qurmanǵazy atyndaǵy konservatorııanyń rejıssýra fakýltetterin bitirdi. Kórnekti memleket jáne qoǵam qaıratkeri Ózbekáli Jánibekovpen birge Torǵaıdaǵy oblystyq mýzykalyq drama teatrynyń negizin qalaýshylardyń biri boldy. Túrli teatr sahnalarynda Qarlyǵa ("Qara qypshaq Qobylandyda»), Teńge («Aıman-Sholpan»), komıssar («Optımıstik tragedııa») sııaqty árqıly rólderdi somdady. Sondaı-aq M.Áýezovtyń «Túngi sarynyn», S.Júnisovtiń «Japandaǵy jalǵyz úıin», Á.Ábishevtiń «Belgisiz batyr», Z.Qabdolovtyń «Sónbeıtin ot», M.Gorkııdiń «Sońǵylar», N.Hıkmettiń «Eleýsiz qalǵan esil er», býrıat dramatýrgy Q.Shagjınniń «Sandyqtan shyqqan shaıtan», bashqurt dramatýrgy M.Kárimniń «Taý qyzy» sııaqty qoıylymdaryn sahnalady.
