Almatyda zardap shekken kásipkerlerge 6,2 mlrd teńgege jýyq qarjy tólendi

ALMATY. QazAqparat - Búgin Almatyda óńirlik komıssııa otyrysynda kásipkerlerdiń jalpy somasy 152 mln teńgeni quraıtyn 31 ótinimi maquldandy, dep habarlaıdy QazAqparat tilshisi.

Maquldanǵan ótinimderdiń ishinde 124,5 mln teńge somasyna 19 ótinim bıýdjet qarajaty esebinen, 12 ótinim «Jańa Alataý» qaıyrymdylyq qorynan 27,5 mln teńgege qarjylandyryldy.

Almaty qalasy ákimdiginiń málimeti boıynsha búginge deıin qalada komıssııanyń barlyǵy 17 otyrysy ótti. Onda bıznestiń tártipsizdikter kezinde 6,2 mlrd teńge somaǵa zardap shekken 1 236 ótinimi maquldandy, onyń ishinde bıýdjet qarajatynan 5 033,3 mln teńge somaǵa 663 ótinim jáne «Jańa Alataý» qorynyń qarjysynan 158,3 mln teńge somaǵa 573 ótinim.

«InfoKazakhstan.kz saıtyna kelip túsken jáne tirkelgen barlyq ótinimder saralandy. Óńirlik komıssııa kelip túsken jańa ótinimderdi qarap, tıisti sheshimder qabyldaıdy. Zardap shekkenderge keltirilgen zalaldy óteý jónindegi jumys jalǵasýda jáne erekshe baqylaýda», - delingen habarlamada.