Almatyda zańsyz júrgen 58 shetel azamaty elden qýyldy
ALMATY. QazAqparat- Almatyda elden shyǵarý týraly sot sheshimin oryndamaǵan Ózbekstan azamattary ustaldy, dep habarlaıdy QazAqparat tilshisi.
Almatyda «Kelimsek» aldyn alý sharasy ótip jatyr. Reıd barysynda 37 jastaǵy ózbekstandyq azamat ustaldy.
Ol Almaty qalasynyń mamandandyrylǵan aýdanaralyq ákimshilik sotynyń sheshimimen jyl basynda QR ÁQbK 517-baby 4-bóligi boıynsha bes jyl merzimge ákimshilik jolmen elden shyǵaryp jiberý túrindegi ákimshilik jaýapqa tartylǵan bolatyn.
«Alaıda, bul talapty ol oryndamady, sodan keıin sot Qazaqstan aýmaǵynan májbúrlep shyǵarý jáne qozǵalys erkindigine shekteý qoıý týraly sheshim shyǵardy», - deıdi Almaty qalalyq PD kóshi-qon qyzmeti basqarmasy bastyǵynyń orynbasary Gennadıı Men.
Esterińizge sala keteıik, Almatyda «Kelimsek» sharasy bastalǵan alty kúnniń ishinde kóshi-qon zańnamasyn buzǵan 1295 adam ákimshilik jaýapqa tartylsa, onyń 1 036-sy – shetel azamattary.
58 shetel azamaty elden shyǵaryldy.
Sonymen qatar, zańdy elemegen qandastarymyzǵa qatysty da ákimshilik shara qoldanyldy.
«Sheteldikterdiń Qazaqstan Respýblıkasynda júrip-turý zańdylyǵyn qamtamasyz etý sharalaryn qabyldamaǵany úshin 235 adam jazalandy. Sheteldik jumys kúshin tartý erejesin buzǵany úshin 24 jumys berýshige aıyppul salyndy», – dep túıindedi Almaty qalalyq PD kóshi-qon qyzmeti basqarmasy bastyǵynyń orynbasary Gennadıı Men.
