Almatyda zańsyz júrgen 310 shetel azamaty elden shyǵaryldy
ALMATY. QazAqparat - Almatyda jyl basynan beri Kóshi-qon zańnamasy 15 904 ret buzylyp, 4 182 is boıynsha shetel azamattary jaýapqa tartyldy, dep habarlaıdy QazAqparat tilshisi.
Sot sheshimimen 310 sheteldik Qazaqstan Respýblıkasy aýmaǵynan shyǵarylǵan. Bul týraly Almaty qalalyq polıtsııa departamenti Kóshi-qon qyzmeti basqarmasynyń bastyǵy Ashat Býtýnchınov málimdedi.
«Almatyda jeke basyn kýálandyratyn qujaty joq 673 shetel azamaty polıtsııa departamentiniń qabyldap-taratý bólimine ornalastyryldy. Sondaı-aq, bıylǵy jyldyń 6 aıynda eńbek mıgranttaryna jeke adamdarda jumys isteýi úshin 34 162 ruqsat qaǵazy berildi jáne uzartyldy. Qazirgi ýaqytta zańsyz kóshi-qon arnalarynyń jolyn kesý jáne sheteldikterdi azamattyq-protsessýaldyq tártipte elden shyǵarý – bizdiń birinshi kezektegi mindetimiz», - dedi ol.
Ol sondaı-aq, polıtsııa Almatyda jyl basynan beri «Kelimsek» jáne «Nelegal» eki respýblıkalyq jedel aldyn alý is-sharasy ótkizilgenin habarlady.
Foto: polisia.kz
