Almatyda zańsyz turyp jatqan qyrǵyzstandyq otbasy anyqtaldy
ALMATY. Qyrkúıektiń 15-i. QazAqparat /Erbol Turymbetov/ - Almatyda kópqabatty turǵyn úılerdiń biriniń astynda turyp jatqan qyrǵyzstandyq otbasy anyqtaldy, dep habarlaıdy QazAqparat Almaty qalalyq ІІD-niń baspasóz qyzmetine silteme jasap.
Qalada zańsyz turyp jatqan bul otbasynda kúıeýi áıelimen jáne 5, 3 jasar eki qyzy bar. Otaǵasy qalalyq páter ıeleri kooperatıvteriniń birinde aýla sypyrýshy bolyp, al jubaıy bazarda satýshy bolyp ornalasyp alǵan. Al balalaryn kámelet jasqa tolmaǵan kútýshi qyzǵa qaratyp qoıǵan.
«Bul Qyrǵyzstan azamattary Turǵyt Ozal kóshesindegi bir úıdiń astyn panalaǵan. Olardyń ornalasqan eki bólmeli páterleri eshqandaı sanıtarlyq talaptarǵa sáıkes kelmeıdi. Sonymen birge, úı ishi ylǵaldanyp ári qatty lastanyp ketken. Bólmelerinde ishimdik bótelkeleri men temeki qaldyqtary shashylǵan. Mine, osyndaı qaýip-qaterge toly jaǵdaıda eki búldirshin kúni boıy qaraýsyz turyp jatyr», dedi Almaty qalalyq ІІD-niń qoǵamdyq qaýipsizdik basqarmasy bastyǵynyń orynbasary Aıgúl Shópshekbaeva.
Polıtseıler barǵanda kishkentaı eki qyz esik aldynda oınap júrgen. Al baǵýshylary dúkenge ketken kórinedi. 16 jasqa tolmaǵan kútýshi bolsa esh jerde oqymaıtyn Talǵar qalasynyń turǵyny bolyp shyqty. Aıyna 10 myń teńge jalaqyǵa qyz búldirshinderdi azanǵy 8-den keshki saǵat 19.00-ge deıin qadaǵalaıdy eken.
«Bul qyzdyń ózi áli bala bolsa, ol sábılerdi qalaı baǵady. Endi biz osy másele boıynsha bul azamattardyń munda qalaı kelgenin anyqtaımyz. Sonymen qatar, zańsyzdyqqa jol berip, polıtsııaǵa esh habar bermegen PIK-in jaýapqa tartatyn bolamyz. Al bul otbasyn kóshi-qon polıtsııasy arqyly óz Otandaryna qaıtarmaqpyz. Olardyń Almatyǵa jumys izdep kelgenderin túsinemiz. Degenmen, eki sábıdiń taǵdyryn mundaı qaýipke aparmaýlary kerek», deıdi A. Shópshekbaeva.
