Almatyda zańsyz saýdadan kólik aınalary tárkilendi
ALMATY. QazAqparat - Almaty polıtsııasy Bostandyq aýdanyndaǵy kóliktiń eski zattaryn satý núktesin tekserdi, dep habarlaıdy QazAqparat tilshisi.
Qalalyq PD baspasóz qyzmetiniń habarlaýynsha, saýdager óziniń garajynda kólik zattaryn satýmen aınalysqan.
«Birneshe saǵat buryn mobıldi top eski kólik bólshekteri saýdalanǵan saýda núktesin anyqtady. Qojaıyn dúkendi óziniń garajynda ashyp qoıǵan. Tekserý barysynda 100 aına men 3 akkýmýlıator tabyldy. Tárkilengen bólshekterdiń arnaıy qujaty joq bolyp shyqty. Qazir bul zattardyń burynǵy qojaıyndary izdestirilip jatyr. Sonymen qatar, aınalardyń urlanǵandyǵy tekserilýde. Japa shekken azamattar bólimshege kelip óz zattaryn alýda», - dedi Bostandyq aýdany Polıtsııa basqarmasynyń basshysy Dáýren Ýtebaev.
Tártip saqshylary aınasyn urlatyp alǵan adamdar bolsa, Bostandyq aýdandyq Polıtsııa basqarmasyna habarlasýlaryn suraıdy.
