Almatyda zańsyz satylymǵa shyqqan taǵy bir turǵyn úı kesheni anyqtaldy
Almaty qalalyq qurylys baqylaý basqarmasynyń aqparatyna sáıkes, ınternet-resýrstarda Dostyq dańǵyly 170/1 mekenjaıyndaǵy turǵyn úı kesheninde páterlerdiń satylýy boıynsha habarlandyrýlar jarııalanǵan.
Atalǵan ýchaskede kóppáterli turǵyn úı (KTK) qurylysyn salý maqsatynda menshik ıesi 2005 jyly Sáýlet-josparlaý ruqsatnamasymen qurylys bastaǵan, sodan keıin nysan salynbaı birneshe jylǵa turyp qalǵan.
«Keıin bul ýchaske basqa menshik ıesine berildi, ol sol ýchaske mańynda zańsyz statsıonarlyq emes saýda nysandaryn turǵyzdy. Basqarma menshik ıesine qatysty zańsyz saýda pavılondaryn súrýge talap aryz berdi. 2023 jyldyń 2 mamyrynda saýda nysandaryn buzý týraly sheshim qabyldandy. Sot sheshimi zańdy kúshine enýi tıis»,- dep atap ótti Almaty qalasy ákimdiginiń baspasóz qyzmetinen.
Taǵy bir talap-aryz ǵımarattyń ózin súrýge qatysty. Ol Medeý aýdandyq sotyna jyljymaıtyn múlikke tyıym salý, QMJ óndirisine tyıym salý jáne ruqsat qujattamasyn berýge tyıym salýdy qamtamasyz etý týraly ótinishpen qosa kelip tústi.
Sot protsesteri áli de júrip jatyr, sot-qurylys saraptamasy taǵaıyndaldy.
Sondyqtan, qala turǵyndaryna joǵaryda atalǵan mekenjaı boıynsha turǵyn úı kesheninen jyljymaıtyn múlik satyp alýdan bas tartqan jón.
«Jyljymaıtyn múlikti satyp almas buryn salynyp jatqan turǵyn úı kesheni týraly qala qurylysyn baqylaý basqarmasynyń shuǵyl baılanys nómirine, ıaǵnı +7 (727) 229-81-36 boıynsha habarlasyp, aldyn ala qujattardyń tolyq paketin tekserip alýdy eskertemiz»,- delingen habarlamada.
Buǵan deıin Almatyda eki turǵyn úı kesheniniń zańsyz páter satýǵa shyǵarǵany týraly jazǵan edik.
